A la darriera amassada generala, Tomàs Hirondelle fuguet elegit coma president de l'association Novelum , seccion perigorda de l'Institut d'Estudis Occitan, en remplaçament de Joan-Lois Leveque, que demòra evidentament dins l'associacion, coma membre plan actiu.

Tomàs es professor d'istòria e de geografia mai d'occitan e demòra a Perigüers. L'i soatam plena reüssida dins sas novelas fonccions.

Veiqui , qui-dejos, una declaracion dau noveu president

 °°

Brave monde bonjorn,

Dempuei lo 30 de mai, Joan-Loís Leveque decidiguet de laissar la man de la presidéncia, aprep 12 ans d’un trabalh subrebeu e remirable (que vai persegre totparier !), e que lo mercejam fòrça per aquò. Sei aura lo noveu president de l’associacion Novelum, que ven de festejar sos 50 ans i a gaire.

Sei fier e onorat d’aquela fisança e eissairai de persegre lo pretzfach qu’es estat menat per mos predecessors .

Dau vòstre costat, si avetz de las idèias o de las remarcas de far, tesiquetz pas ! Eissaiarai, emb las constrenchas que son las miàs de far tot çò que pòde.

Pasmens, crese mai a l’accion collectiva que non pas a la d’una sola persona, quand quò es possible. Quò es per quò que vos convide a passar a l’accion si n’avetz l’enveja e lo temps, e a subretot ne’n parlar a l’entorn de vos e aus autres sòcis de l’associacion. Una còla de dos o tres o mai, quò es mai estimulant e plasent.

Per çò qu’es de mon accion, en defòra de contunhar las activitats desjà engatjadas, vau eissaiar de desvolopar la comunicacion de Novelum e de sas accions (talhiers, socializacion ...) per fin de las melhor far coneisser e de las far frotjar, dins l’esper de formar totjorn mai de locutors e de simpatizants de la nòstra lenga, tot quò-quí dins un ambient d’amistança e de convivialitat.

Vos mercege de m’aver legit e vos envòie mas amistats militantas,

Tomàs Hirondelle

thohiron@gmail.com

Nicolau Puech nos informa que la convidada de l'emission dau diumenc 22 de març 2020 a 11 oras sur França Blu Perigòrd sera Jaumeta Beauzetie per parlar d'un noveu libre "La carta" editat per lo CAPOC. Quò es un libre de cinc contes dins cinc dialectes occitan diferents.

Meitat chen , Meitat pòrc , chasque diumenc a 11 oras sur França Blu Perigòrd!

Per escotar l'emission en directe o en redifusion, clicar sur lo ligam: França Blu Perigòrd

Veiqui lo ligam vers lo site de Joan-Pau Verdier

e los ligams vers lo sites de Nicolau Puech: https://www.nicolaspeuch.com/ e facebook.com/nicolaspeuch

La setmana dau 10 au 14 de feurier 2020, l'establissament d'ensenhament superior occitan « APRENE » de Besiers era en desplaçament en Dordonha per sensibilizar una quinzena de professors de Calandretas (ensenhament laïc immersiu occitan) a la varianta lemosina de la lenga d'òc.

De nombrosas rencontras fugueren organizadas per presentar la lenga, la poesia de Marcela Delpastre o ben « l'importança de la cultura per lo desvelopament economic de la region » emb l'intervencion de Joan Ives Agard ò « La linga occitana e sa literatura dins lo miralh anglés » presentat per Jan Peire Reidi... ò d'enquera per parlar d'escritura coma Joan Ganhaire. Per ma part, deviá projetar las pinturas de Pierre Rapeau dau « Bòsc dau Leberon » a Ajac per parlar daus personatges de nòstres contes lemosins.

Velhada qu'aguí beucòp de plaser a animar dins «quel ostal, bastit de gròssas peiras, a la cima d'un causse … lo fuòc de lenha esclairava dins lo canton... » coma dins lo temps per parlar daus lops e autres leberons ! Mai çò que m'enchantet lo mai, era de discutar tota la serenada nonmas en occitan coma quilhs jòunes professors venguts de tot lo país e d'auvir l'accent doç de Provença, rocalhos de Bigòrra, clar de l'Auda ò choitonat dau Lemosin.. Pensí au poema de Bernat Lesfargas : « poema de pas res », que parla dau plaser d'auvir la lenga

 « per que mon còr bategue

amb son ritme prigond

e drud

per que dins mas aurelhas

nisen las sarralhièras »... *

Seguet un plan bon repas preparat per quauques estagiaris e trinqueren a la santat de nòstra lenga que se resviscòla brin a brin, pitit a pitit, chic a chic, drin a drin, pauc a pauc gràcia a 'quel ensenhament immersiu creat a Pau en 1970. Aura, per l'annada escolara 2019-2020, lo movament Calandreta compta 64 escòlas, 4 collègis e 1 licèu, quasi 4000 escolans !.

En mai 225 ensenhaires e 350 emplegats non ensenhaires (ASEM, animators, secretàris, bibliotècaris, salariats de las federacions despartamentalas e regionalas, de la Confederacion, daus organes de formacion). Qu'es totjorn un començament e sembla que la gent comencen de comprener l'importança de balhar de las raiç  aus escolans !

Una serada plan chalurosa e richa que balha de l'esper !

Jaumeta Beauzetie

*Poema de pas res de Bernat Lesfargas dins « la brasa e lo fuòc brandal »

(afin que mon cœur batte

à son rythme profond

et dru

que dans mes oreilles

nichent les mésanges...