L'emission animada per Joan-Claudi Dugros "Parlem nòstra lenga" del mes de julhet (a partir dau diluns 7) sus Bergerac95 es consacrada a la dubertura en setembre de la Calandreta de Brageirac .

Lo convidat sera Philippe Manet, lo president dels Amics de la lenga d'Òc. Direm qualques mots sus Jean Beausoleil, poèta occitan de Brageirac, puèi que la novela escòla oocitana en imersion portarà lo nom de Calandreta Bèl Solelh.

Renseignemenst sur la Calandreta Bèl Solelh de Bergerac:

los.amics@free.fr ou 0973195579

Partir de diluns 07 julhet e jusc'au 09 de aust, qu'es partit per un mes de conferencias, d'expausicions, d'espectacles e de concerts: lo Festenau de Michel Théodoridès es tornat demest n'autres sur dotze comunas dau Grand Perigüers.

Trelhissac comença lo 07 a 6 oras e demia de l'enser emb l'expausicion «Perigòrd, terra de trobadors» que devria se persegre jusc'a la fin dau mes d'aust.

A Mencinhac, lo 18 de julhet à 18 oras 30, quò sera « Parfum de bal », que mercès daus documents de las Archivas Departamentalas vos fara tornar viure los bals d'autres còps entre 1925 e 1955. De las fotòs d'Elizerman mai de las intrevudas de musicians d'aqueu temps companhan quela expausicion. Dissabde 19 de julhet a 18 oras 30 a Lo Chasteu ( Château L'Evêque), expausicion sur Emila Lafon que pinturet lo chamin de cròtz de la catedrala Sent Front, mai sur lo trabalh de restauracion que fuguet fach per Françoise Perret en 2001/2002. Lo mesme jorn a 21 oras, dins l'eigleisa de Preissac, a Lo Chasteu, l'ensemble Tre Fontane jugara «  Le Duc en scéne » l'òbra de Guilhem de Peitius, prumier trobador conegut e grand-pair d'Alienòr d'Aquitania. De segur emb daus instruments tradicionaus : viela, oud, rebec...( entrada 9€).

Lo 26 de julhet a 11 oras a Cornilha, expausicion-debat « Mémoires de demain », fotòs per Nicolas Lux dau colectatge de la memòria occitana.

Lo 27 de julhet a 17 oras a Anessa e Beuluòc au fogier rurau , lo duò Fingers Crossed jugara de la musica celta ( concert a gratis).

Puei, lo 1^er de aust a 18 oras 30, a Cornilha, l'expausicion « Lo secret de las terras » vos dira tot sur los pigments utilizats per los prumiers òmes de la Magdalena. Lo mesme jorn a Antona e Trigonant a 21 oras, film e debat sur « Memòrias de doman », colectatge realisat per l'Agença Culturala sur 15 cantons en Dordonha e mai de 600 locutors.

Lo 08 de aust a 21 oras, au parc Gamenson de Perigüers, concert de Tri Yann, lo famos grope breton que festa sos « quarante ans et plus ».

Fin finala, lo 9 de aust a 21 oras, lo grope Nadau botara lo fuòc a la « Filature de l'Isle ».

Renseignements et réservations au 0553047849. Billets en vente à L'Office de Tourisme, Librairie Marbot et Maison de la Presse Périgueux; ainsi qu'à L'Espace Culturel Leclerc Trélissac et à l'accueil Auchan Marsac.

Denis Gilabert.

Photo: Michel Théodoridès, Président de Festenau.

Una novela cronica de nòstre autor dau Nontrones

°°

"L’aiga de ròcha te fará morir, filhòta,
L’aiga de ròcha te fará morir.
Te fará morir, o quela aiga, quela aiga,
Te fará morir, es pus clara que lo vin."

‘Quela chançon me fai pensar a la Font Charlespa, dins lo fons de la ruá de Nontron que pòrta son nom. Estiu coma ivern, un pitit fiu d’aiga pissava d’una chanòla conhada dins lo mur de peiras grisas. Era rasis la ruá de Perigús, au pè dau terme. Pissa pus gaire totaura. S’es vut que de l’autre costat de la ruá bassa, se trobava l’auberja Lasterras (*Lasseterre, disian la gent en francés-francitan). Per la felibrejada de 1958, quauqu’un aviá escrich sus un bocin de carton pausat a costat dau tudeu : « AQUI QU’EI MOINS CHAR QU’IN FAÇO ».
I aviá totjorn un potet que se garnissiá d’aiga frescha, e tres o quatre topins de terra o ben de plastic que esperavan lur torn. L’aiga era bona, clara, jauventa. La mainatjavan. La fasian beure aus pitits : un travers-det de vin dins lo veire e de la bona aiga de la font per zo nejar (La chançon ditz ben que l’aiga clara es dangeirosa !). Non, Diu mercés, la gent de chas nos dins las annadas cinquanta ne’n bevian gaire de quela liquor d’anis que apelavan « passetisse », sens pensar a çò que lo mot voliá dire en occitan. Si lur avian dich que cinquanta ans pus tard, la gent sirian oblijats de ‘chaptar de l’aiga en botelhas per dire de beure quauqua ren de pas tròp maujauvent que a pas tròp meschant gost !
Quo auriá plan estat domatge de la laissar perdre, quela bona aiga de ròcha, en la laissar pissar dins lo Merdançon. Z’avetz plan devinat, si setz pas de Nontron ; lo Merdançon, quo es lo rigalhon que cor jos las maisons de las ruas bassas. Tota l’aiga sala anava dedins. Per pausar culòta, la gent davalavan a la cava. Lo cròs dau chiador era drech dessus lo riu dos metres pus bas. Lo fondament bien pausat sus las pòsts, eran plan benaises per escoltar lo marmus de l’aiga…
Aura, l’aiga de l’aduccion es aseptizada, esterlizada. Bevabla, pareis. Davant las fonts, los meras de las pitas comunas, que vòlen pas anar davant los tribunaus si per cas l’aiga fasiá malaude quauque vilaud, an fait plaçar daus paneus « Aiga pas bevabla ». Dins nòstra comuna, l’aiga ven de la Dotz, lo riu que suert de l’estanh de Sent Estefe. Los elegits, que son de la gent serios, defenden d’arrosar los vargiers per temps de sechiera. Los agricultors pompen l’aiga benleu cent metres jos nòstres pès per « irrigar » lo bigarroelh emb lurs canons. De la bona aiga pura que es jos terra  dempuei daus mila d’annadas e que nos tòrna empoisonada.
L’aiga de ròcha te fará morir…

A Marennes, lo 23 de junh de 2014
Jan-Peire Reidi

De legir tanben: Chaucidas dins los blats