Auei, Rubrica en òc rencontra Tomas Irondèla, professor d'istòria geografia mai d'occitan
SO : Tomas, podetz vos présenter en quauques mots ?
TI : Vene de Tarn, dau ranvers de Castres, ai 38 ans e demòre a Perigüers. Sei professor d'istòria geografia au liceu Laure Gatet. Tene l'occitan de familha, de mon pair e mos grand-parents ; aime bien la musicalitat de la lenga, legisse daus autors come Roger Tenèze dau Carcin, Cecila Chapduelh, los trobadors... Ai passat la certificacion complementaria a Bordeu en 2016, quò fai que aura pòde far professor d'occitan. Ai après lo lemosin dempuei que sei aqui en Perigòrd.

SO : Parlem de l'ensanhament de l'occitan...
TI : Au liceu Laure Gatet, anime, per la segonda annada, un talhier de conversacion coma daus eslevas mai daus professors, quò-qui per mon plaser, que sei professor d'istòria geografia dins queu establiment. En mai de quò, queste annada, vene de començar un trabalh de regent a l'escòla bilinga Jules Ferry de Rabeirac , en remplaçament dau regent en comget malaudia. Fau l'escòla a 14 CE1 e 23 CP/CE2. Per io, qu'es une experiença novela.

SO : Daus prefatz per la rentrada ?
Òc- plan, una plan bona novela. Lo collegi Montaigne de Perigüers vai drubir l'opcion en occitan en classa de siesiema e ne'n serai lo professor, doas oras per setmana per començar. Espere que los eslevas van se marquar au cors. Lo collegi fai desjà de las activitats per l'occitan, coma lo programa « Dancem au collegi », que aparentament marcha plan ben. Quò sira lo segond collegi a Perigüers, en mai de Bertran de Born.

SO : D'autras idèias par alhors ?
TI : Sei a preparar un libreton de conversacion en occitan lemosin « Parler comme un troubadour, comme une troubaïritz », mots e expressions correntas, emb de las aisinas de prononciacion, per los debutants, collegians, liceans o adultes, que deuria èsser editat en fin d'annada.

En mai de quò sei charjat d'animar lo facebook de l'associacion Novelum:  https://www.facebook.com/Novelum-IEO-24-421163168345899/.

Zo vesetz, l'occitan es ma granda passion !

Òc-plan, podem parlar d'une vertadiera passion occitana !

Denis Gilabert.

Dijuòus 24 de mai, los collegians de La Coquilha visiteren los dos chasteus de Bordelha, nom daus prumiers proprietaris e una de las quatre ancianas baronias dau Perigòrd, coma Biron, Bainac e Maruelh.

D'en prumier, fugueren acompanhats per l'escrivan Joan Ganhaire per la visita de la partida medievala, que monta au segle XII et XIII. Monteren amont naut dau famos chapduelh de 32 m de nautor que lor balhet una vista plan brava sur lo ranvers de queu borg castrau bastit sur una ròcha au pès de la Drona. L'endrech servet longtemps de prison, se pòden enquera veire los grafitis e dessenhs que los prisoniers fagueren. Dins la prumiera sala, jos la trapa de bois, se tròba una oblueda de sieis metres de prigondor, onte l'un daus filhs de Bordelha fuguet embarrat quauque temps. La devisa daus barons de Bordelha era « Cil gal, aimi l'estord », valent a dire « coma lo jau, aimi la barralha » e lor blason, doas pautas de grifon. Dins la cor, los collegians s'aprumeiavan dau potz de benleu 20 m de fond, pas tròp tot parier, en cas que La Vielha los faguesse segre emb son crochet...Urosament, i avia una grasilha de proteccion.

Activitats de sigilografia e partida Reneissença

Pendant queu temps, una partida daus 5esmes fagueren un talhier de fabricacion de sageus, los autres visiteren lo chasteu Reneissença bastit au segle XVI per Jacmeta de Montbron. L'estile, tipique de questa periòda tornava prener daus elements de l'antiquitat grecò-romana, coma las colonas factiças d'estile dorique, ionique e corentian. Dins quela partida mueblada, se pòden trobar de las armas, de las bravas tapissarias e daus braves gabinets de voiatge. Los audiòguides balhan la possibilitat de far la visita 100 % en occitan.

A la descuberta daus trobadors
Apres lo repas sur las permenadas, lo musician Olivier Peirat faguet una p'ita conferença sur los trobadors e trobairitz dins la bela e brava sala de garda dau chasteu medievau. An descubert lo lut, la viela, la chabreta, l'udu, instruments que juguet lo musicaire per interpretar de las òbras daus trobadors lemosins. Los collegians an aprés que los trobadors eran poetas mai musicians, que lor influença fuguet granda dins l'Euròpa tota entiera, mai lo monde que son aura estudiats au Japon, en Angleterra, en Alemanha, aus Estats-Units. An descubert tanben que i avia totplen de trobadors en Lemosin et en Perigòrd, Bertran de Born, Giraut de Bornelh, Arnaut Daniel, Peire de Brageirac, Guilhem de La Tor (Blancha) e lo quite Jaubert de Pueicibòt, de Sent-Prich Las Faugieras, autres còps conegut jurcinc'en Espanha, mas pas mai dins son quite pais.

Una visita de Bordelha moderna
Los eslevas an pogut veire que l'occitan es enquera un afar plan viu dins lo borg, onte los noms de ruas son marquats en francés mai en occitan. An vist lo pont vielh mai lo molin banau. Aqui, l'occitan es un biais de far veire sa diferença per far venir los toristes ; las associacions coma Pampaligòssa, l'aperò-trad e lo talhier de lenga de Joan Ganhaire son daus endrechs onte lo monde pòden continuar de parlar e d'aprener la lenga.

Denis Gilabert.

France 3 Périgords a réalisé avec les élèves de 6ème du collège Michel Debet de Tocane Saint-Apre un reportage sur les sessions du programme "Dancem au collegi" en préparation de la journée des collégiens "Paratge 2018" à Nontron le jeudi 3 mai.

Ce événement rassemblera 250 collégiens venus de Brantôme, La Coquille, Périgueux Bertran de Born et Montaigne, Tocane Saint-Apre et Sarlat.

Ces sessions étaient pilotées par les musiciens Christophe Célérier et Pau Jochmans, dans le cadre du programme proposé par L'Agence Culturelle et le Conseil Départemental aux collégiens de l'option occitan en Dordogne.

https://france3-regions.francetvinfo.fr/nouvelle-aquitaine/dordogne/perigord/dordogne-occitan-se-parle-se-chante-se-danse-1468627.html

Bonne lecture,

Denis Gilabert