Divendres 5 de julhet, coma a chasca felibrejada dempuei cinc annadas, Lo Bornat dau Perigòrd convida los escolans per una jornada especiala. De segur las escòlas publicas, privadas e la Calandreta Pergosina dau ranvers de Perigüers, mas en mai de quò, los collegis de Dordonha que seguen l'option occitan, passen una jornada a gratis. Chasque grope es aculhit per daus benevòles plan gentes que lor fan descubrir los estands daus òmes de mestier, los artisans : factors de viela o d'arcs, mosnier, belhaires eac. que se trobavan plaça Mauvard o b'etot plaça dau Thouin. An pogut tastar lo jus de poma freschament traulhat, an pogut visar de pres los vielhs tractors, la batuerza, tos los utilhs per la vinha venguts dau sud dau departament.A chasque còp, an trobat dau monde plan plasent per balhar las explicacions

Daus espectacles e de las expausicions

Dins l'espaci François Mitterrand, L'Agencia culturala departamentala avia amenajat  « l'òrt daus trobadors », emb una vesita menada per Joan-Francés Gareyte, una expausicion sur l'occitan, lenga daus trobadors. A l'acialat daus aubres, los escolans podèren auvir daus contes bilingües per la contairtitz Monica Burg e se laissar portar per son imaginari. Puei, an assistat a un concert de Romain Baudouin, vengut de Biarn, que juguet un instrument, boiradis de viena e de guitara electrica, amplificat. Presentet en musica diferents animaus que los collegians devian trobar.

Un moment de chant e de dança

Apres aver trauchat la ruas e charrieras de Perigüers, se'n aneren vers lo parque Gamenson per marendar mai chantar e dançar sur la musica daus Goiats, valent a dire Gilles de Becdelièvre e Nicolau Puech. Cercle circassians,scottishes, rondeus, borreias, brisa-pès...tot lo monde se boteren de dançar maugrat la caumassa. Apres quò, demoret un pauc de temps per far visitar las ruas e plaças de Perigüers e se botar a l'acialat per prener una glaça o beure un còp, avant de tornar au bus.

Escolans e ensenhaires deven grandmercejar lo Bornat dau Perigòrd per queu moment de rencontra que nos balhan a chasqua felibrejada.

Denis Gilabert.

Un cort reportatge sur octele.com per presentar la setmana occitana que se debanet au mes de mai au Liceu Arnaut Daniel de Rabairac , coma los eslevas de Sandrine Salles:

Clicar sur: https://www.octele.com/Jornada-occitana-liceu-rabairac_fiche_3338.html

« Los viatges forman la jòunessa », se-ditz. En mai e junh, quò es sovent lo moment que los collegis e liceus fan un viatge lingüistic e culturau en Angleterra , en Espanha...e de mai en mai,quitament dins lo domeni occitan. La setmana passada, un grope de collegians de Sant Cere en Olt vengueren a Perigüers per coneisser la vila, lo monde. Un autre grope de collegians de La Coquilha e de Sent-Abre passeren quatre jorns en region Occitania, a Albi, Tolosa, Carcassona, Fijac. A chasque còp, quò es un vertadier eschange coma lo monde locau, pas dau torisme « fòra-sòu »( hors-sol), o de pura consomacion, que.

Auvir parlar l'occitan dins la vita vitanta

L'idèia es de balhar aus collegians l'occasion d'auvir la lenga en defòra de la familha, daus collegis, de Perigòrd. Trobam totjorn dau monde per far visitar, per reçaubre, per balhar la man. Un collegi e un professor per far un bessonatge e aculhir los eslevas de Perigòrd. Trobam tanben daus engenhors capables de parlar de lor mestier dins de las entrepresas mondialas coma Airbus o Thalès Aleniapace ; una responsabla dau torisme que fai visitar lo Capitòli de Tolosa, un grope tradicionau que fai dançar, chantar ; un concert coma « Brick a Drac » que fai bolegar lo trad coma jamai...Tots quilhs monde balhan sovent de lor temps personau, se fan un plaser de reçaubre los eslevas e de parlar l'occitan naturalament, coma fasem quand vam en Espanha o en Angleterra. E sabetz pas ? Los escolans comprenen e vesen ben qu' avem quauquaren mai en comun. E an la pròba que la lenga es viventa, maisei que es parlada, per dau monde que aurian pas cregut saber parlar. Quitament si quò es pas lo mesme dialecte. Per mielhs coneisser lo pais onte viven.

Una imersion vertadiera

Un daus sovenirs los mai fòrt d'un de mos viatges era lo moment que los collegians d'Albi fagueren visitar la vila en occitan aus Perigòrds. Los collegians eran plan surprès. N'i a d'autres jòunes que parlan la lenga ? En mai de quò, los comprenem! Pensan que ilhs, saubrian pas zo far, quitament pas en francés,mas quò es faus. Un jorn, lor tornaran quela visita en lor far descubrir lo Perigòrd. Vesem ben qu'avem totplen de chausas en comun. Laidonc, perqué pas far doman entau per los grands, coma zo fan dins lo Tarn o b'etot a Tolosa? Perqué pas doman far visitar Perigüers, Sarlat, Brageirac en occitan a los que vòlen ? Benleu una oportunitat de diferenciacion, de torisme « inteligent » e d'emplechs per nòstres jòunes, justament.

Denis Gilabert.