Per los cinquante ans de Novelum IEO Perigòrd, avem damandat a Micheu Chapduelh que ne'n fuguet lo segond president apres Joan Ros de nos parlar de sos melhors sovenirs emb l'associacion.

"Me sovene de l'amassada de prefiguracion de Novelum en 1969 au chasteu de la Brangelia a Vancens coma Joan Ros, Pierre Derozier, Jaume Surpas...Pierre Derozier avia una consciencia politica mai aguda, emb VVAP ( Volem Viure Al Pais).

Perqué fondar una novela associacion? Quò era un biais d'abordar las chausas un pauc diferent:  « Devem pus nos i prendre coma lo vielhs », disiam... Quò era lo moment. I avia desjà l'Ostau Occitan a Bordeu.

Joan Ros, que fuguet lo prumier president de Novelum era professor a Rabairac lo prumier ensenhaire d'occitan apres los majoraus Fornier a Perigüers e Sicard a Brageirac. Io, era enquera estudiant a Bordeu e venia d'escriure « Lo còr e las dents ».

Voliam tanben promover la grafia normalisada de la lenga.Josef Ros en Lemosin avia desjà fach un trabalh sur la grafia de la lenga; avem fach un trabalh sur la norma. Marcela Delpastre avia una consciencia mai aguda de la cultura occitana e avia publicat "La vinha dins l'òrt" que parlava de "La granda fermentacion". Joan dau Melhau fasia daus estagis per los dròlles...

Quò fermentava de pertot : chançon, teatre, contes...coma Joan-Lois Garriga, Patric Salinier, Monica Burg, Joan Bonafont e d'autres coma Joan-Francés Latornaria. Au teatre, aviam Didier Duponteix daus "Leberons de la Dobla", Adeline Izac, que era autriça professionala... Fasiam dau colectatge daus vielhs per transmettre la cultura orala, coma per exemple los contes dau sarladés.

A l'epòca, fasiam de las velhadas jusc'a tres còps per setmana per se far coneisser ! Dubrir un cors d'occitan au collegi era aisat. Quò es aprep que quò venguet mai complicat.

La dubertura sur lo malhum de l'IEO nos faguet coneisser daus comedians coma Claude Alranq, daus chantaires coma Claudi Marti e tots los autres autors occitans".

Colectat per Denis Gilabert.

Fotò: Micheu Chapduelh, chas se a Agonac

Visatz un pauc una reproduccion dau famós « Angèlus » de Millet e imaginatz… Imaginatz que quilhs paisans de la tenguda tant respectuosa e piosa visan vers lo ciau e pas umilament vers la terra. Imaginatz que l’òme brandisse son chapeu coma per saludar, que la femna en plaça de júnher las mans las druebe coma per dire la benvenguda, que los auseus dins lo ciau a drecha vòlen en V, en bona formacion. Signe de benvenguda, signe d’ofèrta, simbòl de l’òrdre naturau, veiquí qu’una pintura crestiana vendriá un remirable tableu pagan. Lo vòl en V en bona formacion nos diriá que dins la natura tot a un sense, tot es en òrdre, un òrdre qu’òm podriá creire immudable. Quò seriá una volada de gruas. Los paisans las saludarián. I a pas tant de temps que zo fasián enquera. E mai, segur n’i a que zo fan totjorn, que se ’restan de trabalhar per las veire passar, las saludar.

Quo es que las gruas son lo signe dau grand cicle de la natura. Quò es pro d’esperar e tot tòrna, lo brave temps après la freg, la freg après lo brave temps. « Gri-gro ! pausatz lo pelisson, prenetz los guenilhons !» disen las gruas au printemps. E fin d’octòbre : « Gri-gro ! pausatz los guenilhons, prenetz los pelissons ! »

Anonciar l’ivern, quo es pas una meschaenta novela : l’ivern fai partida dau cicle, dau retorn annadier. Tot contunha de virar.

Malurosament las gruas son vengudas fòlas : se ’restan aquí sens mai tornar partir, perden lo nòrd, e mai daus còps doàs voladas se crosan en plaça de se segre. Pas besonh de grands sabents per nos dire que i a quauquaren de purrit dins lo climat, que quò vira pus coma faudriá.

Micheu CHAPDUELH

La télé 100 % occitane sur internet propose en diffusion gratuite le film de Patric Lavaud "Micheu Chapduelh, una pensada sauvatja". http://www.octele.com/video-oc/films/pensadasauvatja.html .

Michel Chadeuil, auteur de très nombreux ouvrages en occitan et en français, a été toute sa vie un fin observateur de l’ancienne civilisation paysanne. Sa « pensée sauvage » se fait l’écho d’une vision du monde, aujourd’hui disparue, qui plongeait ses racines dans l’animisme, le fantastique et le chamanisme.

Ce film est un excellent complément à son livre "J'ai refermé mon couteau"

Cette version en occitan sous-titrée français est à ne rater sous aucun prétexte!