Quo es benleu ço qu' aurian chantat los Beatles, apres un meschant ivern que portava mau son nom. Per ço que, d' ivern vertadier , ne'n avem pas agut. Pas de freg, pas de nevia, de l'aiga, de segur e mai que ne'n voliam.« Que d'aiga, que d'aiga » coma disset lo president Mac Mahon a Tolosa. E dau vent tanben sur lo littorau onte la plajas dispareissen e se cubren de tot nòstre retrum que nos tòrna la granda aiga, coma una indigestion vergonhosa e acusatritz.

Urosament en Perigòrd, ren de tot quò, nonmas de las terras aigassadas, daus rius e de las ribieras que uflan e sabrondan e dau retard dins lo trabalh daus paisans, daus vinhairons mai daus amoros de lor vergier.

Mas queste còp, dempuei una setmana, avem benleu un avant-gost de la prima, dau primtemps qu'esperam per lo vint de març. Los borrons e la prumièras flors començan d'espelir, lo ciau tòrna blu, lo monde tòrnan au merchat emb daus risons sur la pòtas, las femnas son mai bravas, los auseus se trapan de chantar e l'ome estifla en trabahlar dins son vergier. Esperam tot parier que lo giau vai pas tot fotre en l'aer en abriu mas bon, nos fau demorar positiu e prener lo brave temps quante ven!

Quo es per quò que aimeria ben vos perpausar doas chausas.

La prumiera, per los que vòlen escrire, de far daus textes corts (max.1400 signes) en pròsa o en vers sur lo tema dau primtemps en Perigòrd, paraulas de chançons, dires d'autres còps, permenadas dins la natura, lo plaser de far son vergier, los risons de la femnas e daus mainatges, la botanica e.a.c...Tot ço que vos platz!

Sabe aitot que i a demest v'autres daus fins fotògrafes. Parier: si queu brave temps, la natura, lo bestium, lo trabalh daus champs, lo patrimòni, los òmes vos inspiran, fasetz de las bravas fotòs.

Vos dona jusc'au 28 de març per me far segre vòtres textes e vòstras fotòs, au flor e a mesura, a l'adreça que seg: philippe.p.christophe@gmail.com .

Co que ne'n farem? Per los fotòs, drubirem un albòm sur lo blògue Rubrica en òc , per los textes, zo publicarem graciosament sur lo blògue tanben e chausirem un de quilhs textes per una de las rubricas a la debuta d'abriu. Veiqui la prumiera iniciativa de l'annada per los legeires de Rubrica en òc, laidonc, fasetz chaufar los estilòs et los aparelhs fotò e laissatz espelir vòstra inspiracion !

Denis Gilabert.

La 95e édition de la Félibrée du Bornat dau Perigòrd se tiendra à Verteillac, les vendredi 27, samedi 28 et dimanche 29 juin. Le thème de cette année sera les céréales.

Vos crede uei « Ajuda !Ajuda ! ». Pas au secors totparier… Sei plan content si ai pogut de temps en temps vos aprener quauquaren. A vòstre torn, si podetz, de me comolar quauques cròs, de m’ensenhar de las chausas que sabe pas o que sabe nonmàs un petit pauc e qu’aimariá saber mielhs per zo botar dins quauque libre per que quò se perde pas.

Sem dins lo temps de carnaval que d’uns disen « carnavau », d’autres « carnavar, carnavèr, quernavèr ». Coma sabem pas tròp d’onte es surtit queu mot, sabem pas qui a rason. Mas tot lo monde sap ben que quò tomba totjorn un dimarç, lo « dimarç gras » e que l’endoman quo es « las Cendres ». Lo monde se’n sovenen, nos contan enquera çò que fasián quilhs dos jorns. E n’i a que zo fan enquera. Quo es pas la mesma chausa pertot mas i aviá totjorn quauquaren. Per contra lo monde se sovenen que i aviá d’autres jorns, avant lo carnaval, onte se fasiá quauquaren tanben, mas degun nos a jamai contat qué. A! Si quauqu’un podiá respondre a mas questions !Las veiquí quelas questions.

Lo dimenc d’avant lo dimarç gras, era lo « dimenc gras ». Es quò que quauqu’un sap çò que se fasiá queu jorn ? Un plat especiau ? Una tradicion ?

Lo dimenc d’avant lo dimenc gras, quo era « tira-codena ». Vesem ben que quò a un rapòrt emb lo pòrc, la tessonariá, lo minjar… Mas que fasián ? Qué minjavan ?

Lo dimenc d’avant « tira-codena », quo era « vielh dimenc ». Per que disián entau ? Qué fasián ?

Enquera mielhs : i aviá un autre jorn que disián « tira-piau ». Quau jorn quo era ? Coma se situava per rapòrt a carnaval ? Qué fasián ?

Las melhors responsas vos vaudrán un grand mercès e un petit present. E tant que li setz, podetz tanben vos contar çò que se fasiá per lo carnaval avant que quò siá nonmàs un desfialat d’eschtromfs. Micheu Chapduelh

Si ces questions vous inspirent, envoyez vos réponses, en occitan ou en français à novelum.ieo24@free.fr ou par courrier à Novelum, 95 route de Bordeaux 24430 Marsac sur l'Isle ou en commentaire sur ce blog. Ne soyez pas timides! Le fond compte plus que la forme ! Denis Gilabert.