Messatge de Tomas Irondela, President de Novelum IEO Perigòrd

Bonjorn brave monde,
Setz benleu desjà assabentats d'aquela nòva fòrça importanta per tot lo movement occitanista.

Lo 10 d'octobre 2020, sem convidats per lo collectiu "Pour que vivent nos langues" a nos recampar e a far veire nòstre estachament a la lenga occitana e a sa transmission, notadament per lo biais de l'escòla
http://www.pourqueviventnoslangues.com/
Novelum e tots sos aderents se deven mobilizar queu jorn-quí, d'un bais o d'un autre. Ai pensat a una preséncia au merchat de Perigüers lo dissabde de matin, de far venir daus musicaires e tener un estand d'informacions. De veire emb las condicions sanitàrias dau Covid.

Benleu qu'avetz vautres tanben de las idèias a partajar ?
Quò es lo moment, totas las idèias e las bonas volontats son benvengudas.

Reçaubretz mai de detalhs sus l'organisacion d'aquel eveniment en Perigüers tanleu que aurem mai d'informacions sus las autorisacions per la vila de Perigüers .

Amistats occitanas,
Lo president de Novelum,
Tomàs Irondela

Jeudi 12 mars à 20 h 30, Xavier Jullien , sera l'invité de la réunion mensuelle du TCOP qui se tiendra au café associatif « Les Thétards », 7 rue de la Bride à Périgueux.

Il y parlera de la Maison occitana de Perigòrd et de La Calandreta Pergosina.

La setmana dau 10 au 14 de feurier 2020, l'establissament d'ensenhament superior occitan « APRENE » de Besiers era en desplaçament en Dordonha per sensibilizar una quinzena de professors de Calandretas (ensenhament laïc immersiu occitan) a la varianta lemosina de la lenga d'òc.

De nombrosas rencontras fugueren organizadas per presentar la lenga, la poesia de Marcela Delpastre o ben « l'importança de la cultura per lo desvelopament economic de la region » emb l'intervencion de Joan Ives Agard ò « La linga occitana e sa literatura dins lo miralh anglés » presentat per Jan Peire Reidi... ò d'enquera per parlar d'escritura coma Joan Ganhaire. Per ma part, deviá projetar las pinturas de Pierre Rapeau dau « Bòsc dau Leberon » a Ajac per parlar daus personatges de nòstres contes lemosins.

Velhada qu'aguí beucòp de plaser a animar dins «quel ostal, bastit de gròssas peiras, a la cima d'un causse … lo fuòc de lenha esclairava dins lo canton... » coma dins lo temps per parlar daus lops e autres leberons ! Mai çò que m'enchantet lo mai, era de discutar tota la serenada nonmas en occitan coma quilhs jòunes professors venguts de tot lo país e d'auvir l'accent doç de Provença, rocalhos de Bigòrra, clar de l'Auda ò choitonat dau Lemosin.. Pensí au poema de Bernat Lesfargas : « poema de pas res », que parla dau plaser d'auvir la lenga

 « per que mon còr bategue

amb son ritme prigond

e drud

per que dins mas aurelhas

nisen las sarralhièras »... *

Seguet un plan bon repas preparat per quauques estagiaris e trinqueren a la santat de nòstra lenga que se resviscòla brin a brin, pitit a pitit, chic a chic, drin a drin, pauc a pauc gràcia a 'quel ensenhament immersiu creat a Pau en 1970. Aura, per l'annada escolara 2019-2020, lo movament Calandreta compta 64 escòlas, 4 collègis e 1 licèu, quasi 4000 escolans !.

En mai 225 ensenhaires e 350 emplegats non ensenhaires (ASEM, animators, secretàris, bibliotècaris, salariats de las federacions despartamentalas e regionalas, de la Confederacion, daus organes de formacion). Qu'es totjorn un començament e sembla que la gent comencen de comprener l'importança de balhar de las raiç  aus escolans !

Una serada plan chalurosa e richa que balha de l'esper !

Jaumeta Beauzetie

*Poema de pas res de Bernat Lesfargas dins « la brasa e lo fuòc brandal »

(afin que mon cœur batte

à son rythme profond

et dru

que dans mes oreilles

nichent les mésanges...