La chadena de television 100 % en occitan sur internet, octele.com, ròda de las visitas filmadas en occitan en entrepresa dins l'encastre de l'emission " T'òc, t'òc prumiera vesita " ( https://www.octele.com/T-c-t-c_290.html ).

Dimecres 20 de novembre, Corentin Besse e Myléna Blanchard Dos Santos, elevas occitanistas de 3esma au collegi Charles de Gaulle de La Coquilha an visitat Fargeot-Podowell, fabricant de pantoflas e chauçaduras situat a Tivier en Dordonha, acompanhats de l'equipa de octele.com menada per lo journaliste David Grosclaude.

Lo guide en occitan era lo chefe de talhier Laurenç Chabòt.

Visita fòrça interessanta dins una entrepresa que prenguet un viradis estrategic e que ven nonmas de reçaubre lo premi de l'innovacion mai lo premi Nouvelle-Aquitaine (https://www.sudouest.fr/2019/11/13/ces-entreprises-leaders-de-l-economie-localedix-entreprises-etaient-en-lice-6817095-1733.php )

Doas activitats principalas

L'entrepresa familiala fuguet creada en 1930 e tornada prener per los cosins Alexandre e Charles Bataille en 2016. Lo saber-far de basa era la fabricacion de pantoflas charantesas. A partir de 2008, an investit dins la rechercha e an developat una segonda activitat : la chauçadura paramedicala jos la marca Podowell en 2009. Quela activitat representa aura 60 % de la chifra d'afar. 90 personas trabalhan dins l'entrepresa, a la creacion, produccion, expedicion, bureus e venda. Venden mai que mai aus merchants de chauçaduras en França, dins las farmacias, a l'expòrt dins 35 pais e aura un pauc per internet( https://www.podowell.fr/ ).

"Coma far una pantofla ? Seguetz-me !"

Laurenç Chabòt, chefe de talhier, faguet segre aus dròlles tot lo processus de produccion. D'en prumier, los stilistes enginhan los modeles ( doas colleccions per an), puei, fan de las « fòrmas » que bòten « a plat » e la produccion pòt començar, coma los obriers e obrieras sur las machinas. Lo feutre ven d'una entrepresa que se tròba a Mazamet-Aussilhon dins lo Tarn, d'autres materiaus venen de Nantes, d'Espanha mas totas las pantoflas o las chauçaduras son fabricadas aqui, sur lo site de Tivier. An aura una novela marca, "Chausse mouton" ,estampilhada Perigòrd. Per lo paramedical Podowell, l'entrepresa fai totplen d'estudis per mielhs respondre aus maus de pés. Myléna e Corentin an pogut pausar de la questions e quitament essaiar « la chabra » , un biais d'esvirolador per donar a la pantofla son aspect finau apres l'aver cosuda. Laurent Chabòt balhet fòrca detalhs sur la produccion e l'entrepresa dins una plan bona lenga occitana lemosina, sens utilisar lo francés.

En surtir, los eslevas fugueren presentats au PDG Monsur Alexandre Bataille que lor disset au reveire en occitan. An grandmercejat lo PDG e mai que mai Monsur Chabòt per sa disponibilitat e sas explicacions.

E ben òc, quò es possible de produsir aqui en Perigòrd, en demorar fidele aus saber-far locaus, en esser innovator, dubert sur lo monde e en parlar occitan! De veire dins pauc de temps sur octele.com.

Denis Gilabert.

Fotò amont naut: los elevas occitanistas Mylena e Corentin entre Mm. Bataille e Chabòt e l'equipa de octele.com menada per David Grosclaude.

Face aux difficultés que rencontre actuellement l'enseignement des langues de France, notamment au lycée, une pétition est actuellement en ligne:

https://www.change.org/p/jean-michel-blanquer-mobilisation-g%C3%A9n%C3%A9rale-pour-que-vivent-nos-langues

Par ailleurs, une manifestation aura lieu samedi 30 novembre à Paris devant le ministère de l'Educ nat), le prix des billets de train (tout ou partie) seront pris en charge par la FELCO (Fédération des enseignants de langue et culture d'Oc). Si vous souhaitez y aller n'hésitez pas à me contacter.

Vendredi 11 d'octbre, le departament de Dordonha e L'office Public de la Langue Occitane (OPLO) organisavan a Perigüers la tresiesma "Jornada de ligason collegi liceu" que permet aus eslevas occitanistes de tretze collegis e lyceus de Corresa, Dordonha et Nauta-Vinhana de se tornar trobar. Lo tema de questa annada era « De la collecte occitane à la création contemporaine » .

Tretze establiments s'eran marcats per quela Jornada de ligason, los eslevas de quatriesma a la segonda agueren l'occasion de se trobar a l'espaci François Mitterrand, sieti de l'Agencia Culturala per veire un espetacle, de las espausicions e far ,en gropes boirats, un daus quatre talhiers tematics. Lo prumier talhier era la pratica musicala e intrumentala per Christophe Célérier e Adrien Fossaert. Los jòunes an pogut descubrir e essajar daus instruments, fagueren de las percussions, dau chant. Lo segond talhier que fuguet animat per Monica Burg e Fanny Rousseau e utilisava daus elements dau colectatge de la memòria occitana e l'expausicion de planchas de BD de Gilles Rochier. Lo talhier 3 ,que avia per tema lo chant, era menat per Gilles de Becdelièvre. L'animator utilizava daus bocins de colectatge de chant sur lo site d'archivas en linha http://www.sondaqui.com/, mai dau trabalh de Micheu Chapduelh sur los mimologismes. Ne'n fagueren un enregistrament, que sera leu botat a dispausicion daus eslevas. Lo talhier 4 era la descuberta de « Hortus Vergier Trobador » per lo botaniste Joan-Lois Orazio e lo mediator de l'Agença Culturala e autor Joan-Francés Gareyte. Expliqueren la foncion dau vergier medievau e fagueren lo ligam emb la poesia daus trobadors.

Una convencion signada

En presencia daus eslevas e professors, Regina Anglard, Viça-Presidenta dau Conselh departamentau, signet coma Charline Claveau-Abbadie , de l'OPLO una convencion de cooperacion sur l'ensanhament escolari, aus adultes, sur la plaça de la lenga dins la vita publica, e sur los medias. ( cf nòstra fotò)

"Je ne parle pas occitan en public"

Quò era lo nom de la peça de teatre jugada au Palace per los comedians de la Compagnie Lilo, de Mencinhac. La comediana Emilie Esquerré, coma Jean-Marc Foissac e Françoise Joubert, juega un personatge que compren mas parla pas la lenga e que vòu ne'n saber mai sur sas originas familialas e tanben, saber perqué l'i an pas transmetut la lenga. Los eslevas van de segur ne'n tornar parlar en cors, de quela problematica que coneissen plan per la viure se-mesme, lo mai sovent.

Coma de costuma, pas de rescontre sens baleti e quauquas chançons avant de tornar a maison !

Denis Gilabert.