Zo sabetz benleu pas, fau ( entre autres...) lo professor d'occitan au collegi. Vos vau contar çò que m'arribet questa setmana dins una classa de sieisiema.

Eram a revirar de las frasas de francés en occitan. Tot anava ben, los eslevas de quela classa son motivats e actius. A d'un moment, cherchavam un mot qu'era pas tant aisat que quò a trobar. De costuma, los eslevas zo tròban pas tots solets, an mestier de io o daus diccionaris. Demandi : « Sabetz, coma se ditz... en occitan? ». Una goiata levet la man, a mon grand estonament e donet la bona responsa. « Plan-ben l'i dissi, onte as trobat queu mot ? ». La goiata m'espiet emb daus uelhs malicios e disset ( en francés) : « L'ai tobat sur Mongrandpair.com » . Un bon biais de dire que daus uns còps, la comunicacion en linha...familiala foncciona enquera. Plan fina, la goiata. Quand comprengueren, tota la classa se botet a rire. Plasent e risolent, n'es quò pas? Nonmas per entau daus moments, aime plan far çò que fau.

Denis Gilabert

Patric nos a preparat quauques nhòrlas que publicarem pauc per pauc, a flor e a mesura.

Apres la sopa...

Lu pitit vaslet dau pair Chanisson se planhá que los repas èran tròp eslunhats... Eu n'èra nonmas valhent a tabla. Un jorn, per lo 'trapar, Chanisson li disset, après lu marende :

-    « Ne barra pas ton coteu, tant que nos som a tabla, nos vam sopar ! »

-    « Vole ben, si qu'es de vòstra complesença, » disset lu vaslet e eu faguet honor au repas coma si eu viá pas minjat de uech jorns.

-    « E ben, faguet lu mestre, aura que nos am marendat e sopat, nos vam 'nar au trabalh. »

Lu pitit essujet sas bochas, barret son coteu e responguet :

-    « Quò n'es pas entau que ne'm fai chas nos... »

-    « A ! e coma vautres fatz, endonc ? »

-    « N'ai pas mestier de vos zo dire, vos zo sabetz tanben coma me : apres la sopa, ne'm vai au liech !!! »

Octele.com a virat daus braves pitits filmes emb dau monde conegut o non en Perigòrd.

S'apelen "Lenga d'òc, lenga de còr", ne'n avem desjà botat quauques uns sur lo blògue de Rubrica en òc.

Veiqui aura Frederic Dubuisson, responsable dau raion libres a la libraria Marbot de Perigüers:

https://www.octele.com/Lenga-c-lenga-c-r-frederic-dubuisson_fiche_3730.html