« Colères et portraits », c'est le nouvel ouvrage en occitan de Micheu Chapduelh et de son fils Danis, un recueil de chroniques « parano-dérisionistes » et de portraits écrits entre 1996 et 2013 et parus dans les revues Anem Occitans, Lo Gai Saber, Paraulas de Novelum, La Setmana et Lemouzi.

Nous les avons rencontrés pour nous en parler.

Quelle différence avec le volume 1 de « Coleras » paru en 1996 ?

Lo prumier volum era tematic, queste còp, ai chausit de botar los textes dins l'òrdre cronologic. Entau podem mielhs veire l'avançada de las chausas e descubrir que quelas coleras an sovent malurosament un costat profetic: ço que semblava completament absurda es devengut la nòrma apres quauquas annadas.

Pourquoi "parano-dérisioniste" ? 

Sem jamai pro paranoiac, que ço que vai nos tombar sur lo chais es totjorn pieg que ço que podem cranher. Derisionista, que volem entrar dins la logica, ne'n rire e ne'n far rire.

Quelle différence entre le père et le fils ? 

Danis: a la debuta , ai començat d'escriure un pauc "à la manière de" per imitar mon pair sur internet(potonorsland.com, de veire qui-dejos). Sei mai dins l'imediatetat, la colera vertadiera. Micheu : io marque ma colera e prene un pauc de reculament per escriure.

Et comment avez vous choisi les textes ?

Micheu: Joseta, ma femna, que daus un còps fuguet a l'origina de las coleras nos ajudet a chausir e a far "pitinar la pensada".

Le résultat ? Un ouvrage qui à la manière de La Bruyère dénonce les travers et la faiblesse du « prêt à penser » actuel et propose au contraire une réflexion riche qui remet en cause, questionne, met le doigt où cela fait mal avec causticité et humour. Sont égratignés les nouveaux gourous de l'économie, de la philosophie, de l'écologie citadine. Les agences de notation "AAA", le rôle du père "Serem jamai papets", le genre, le rôle de l'état, l'enseignement, la précarité, l'économie("Tot era religios, tot es economic"), le monde mercantile...tous les thèmes qui agitent notre société y sont abordés avec l'humour et la dérision habituels qui nous poussent à réfléchir sans vouloir à toute fin nous imposer un point de vue unique ( oui, c'est possible!). Qui plus est, le propos est porté par la langue occitane qui l'exprime avec richesse, force,subtilité et élégance.

« Coleras e retrachs » 16€ édité chez IEO Edicions et dans les librairies livrées par Novelum-IEO Périgord.

Denis Gilabert.

Voir le site de Danis Chapduelh http://potonorsland.com/2013/10/02/pais-polit-daus-potonors/

Per chabar nòstra seria sur los contes e bien començar l'annada, un present de Jan-Peire Reidi, una cronica entre Nadau e estrenas.

Bona annada a tots.

°°

Lo pus brave conte de Nadau que coneisse, quo es « Lo Present daus Reis Matges », una novela d’un escrivan american dau segle dietz-e-nòu, O. Henry. Un dròlle e una dròlla nonmas maridats son talament paubres que an pas de que viure, mas, per Nadau, vòlen a tota fòrça, l’un coma l’autre, far un brave present a la persona que aimen mai que tot au monde. Coma far quante òm a pas lo sòu ? La sola richessa de la jòuna femna, quo es sos piaus : longs, frisats, color de fuòc… una beutat ! L’òme, de son costat, es plan fier de la brava montra d’argent que li ven de son grand-pair, una montra que auriá plan mestier d’una chadena… Avetz devinat : la femna vend sos piaus e ‘chapta una chadena d’argent per la montra de son òme, dau temps que l’òme vend sa montra per que sa femna puesche penchenar sos braves piaus emb una penchen d’ivòri…
Òm tròba d’autres contes de Nadau doç-amars coma queu-‘quí dins la literatura anglesa e americana. Dins ‘quilhs país, la tradicion daus presents per la Nadau es mai fòrta qu’en Occitània. Nadau vòu estre la festa de la patz e de la bontat universala, de la jòia partejada, daus mainatges que s’esmiraudien d’una beutat cosmica davalada sus terra.
Afen, quo era benleu entau avant l’orror de la musica en conserva e daus Pairs Nadaus roges dins los subremerchats, de las babòias pendilhadas a las gotieras, de las guirlandas luminosas dins las ruas, mai daus mila de lampirons que pilhonen sus las quitas maisons en defòra de las vilas. D’alhors, dins la prumiera partida dau segle vint, los goiats de chas nos a la campanha, coneissian gaire lo Pair Nadau. Non, i aviá pas de pinhiers dins las maisons – ne’n plantavan de’n pauc mai beus a l’entrada daus chamins per la nòças o ben dins las charrieras, contre las granjas, per los conselhiers. Tots los sers de l’Avent, fasiam bruslar una lonjor de la bilha de chaisne quilhada dins la chaminéia, pendent que los dròlles fasian sonar la clòcha de l’egleisa de Nontroneu. La velhada davant lo fuòc … Una clòcha dins la nuech…
Crese que quò venguet aprep la guerra, ‘quel afar de Pair Nadau. La gent se meteren de far coma los vilauds. Los sotliers davant la chaminéia, z’ai conegut. Los presents ? Un aurantge, de las pralinas, quauque jugaron de boesc… Mas chas nos devian pas prener tròp de pena per nos far creire au Pair Nadau, perque, aüei, me damande si i ai jamai cregut. Ieu fasiá benleu dau Pair Nadau coma la gent fasian daus surcelatges : zo cresiá sens zo creire.
Pas coma mon jòune filh quand era a l’escòla mairala… Un còp que lo Pair Nadau aguet donat los presents aus pitits de l’escòla, l’òme s’eissubit darreir lo bastiment. Mon dròlle, enquera enviblat, lo seguet.  Veguet lo Pair Nadau troçar son manteu roge per pissar contre lo mur. La poesia era roinada… « Il fait pipi, le Père Noël ! », çò-ditz lo goiat, plan chucat !
Non, la festa daus presents, quo era las Estrenas. La granda feira de Nontron – la Feira de las Estrenas – se teniá aprep la Nadau, lo 28 de decembre, si me trompe pas. Se’n vendiá, de las pralinas ! Lo Jorn de l’an, portavam una topina de graissa o ben una botelha d’aiga de vita a la dama de l’escòla. Nos fasiá entrar dins son lotjament au prumier estatge de la maison d’escola – pausavam los pès sus lo planchat lusissent – e nos donava una cròta de chocolat. Los monsurs donavan las estrenas a lurs vaslets e lurs chambarieras. Quo era benleu lo sole jorn de l’annada que los goiats embraçavan de las femnas que eran pas de lur familha. Fasiam pas la bisa a tot lo monde coma au jorn d’aüei ! « Vos soate una bona annada ! » « La te desire de mesma ! »
Aura, pus d’estrenas. Lo jorn de Nadau, daus modelons de papier chafrelhat e de ribans envertolhats s’apilonen jos lo pinhier. I a de la gent embarromats. N’i a d’autres que an pas tròp de sòus, mas que an fait coma los dos amoros d’O.Henry per far plaser a los que aimen. Se fai enquera de las creschas dins las egleisas. L’òrretat comerciala empaichará pas la gent de s’aimar e los mainatges de raibar.
Jan-Peire Reidi

Segond conte de Daniel Lhomond revirat en òc e mandat per Joan-Pau Verdier.

°°

Lo Bonòme Ivern

Estranh Nadal, fasiá caud a Peirigus. Pas caud coma en estiu mas d’aquesta calor a vos opressar un pauc, a vos far damandar : Mas que se passa ? Deviá se passar de las causas puèi que los Paires Nadal avián disparegut de las veirinas de veire. Al caire de la carrièra, lo Paire Nadal del magasin de juguets, un verai en carn e en òs, aviá daissat son pòste ilh tanben. Pasmens ièr enquera, cantava Jòios Nadal a plena gòrja. A plena gòrja…

Fasiá caud, las carrièras prenián la lentor de la suausetat, los fuòcs roges s’endurmelavan. E avèm vist arribar un Paire Nadal tot en verd. Un Paire Nadal vestit d’una manta verd-poma, emb deus òrles en blanc. Un crane costume ben copat… mas verd. S’es aprueimat, a eissejat de distribuar qualques jugarons de sa benasta, mas los mainatges lo fugissián. La color sens dobte…

- S’acostumam talament a las colors ! a dich una filhòta que semblava al Pitit Causa

Lo paire Nadal verd a risolat :

- E òc, se desacostumam ben redde tanben… vesètz, m’apeli lo Bonòme Ivern. Sèi tot en verd perque anonci la prima a venir, lo novelum. Dempuèi deus milenaris, pòrti la bona novela deus borrons a venir dins qualques lèu, deus semens a viure al ralentit avant de bissonar ! E la bona novela enquera deus nenets a naisser ! Lo blat, lo pomier e mai d’autres an mestier de coneisser mon freg avant de saborar lo printemps ! Dins cada país aviái un nom, deus còps una quita femna fasiá lo trabalh, pas de sexisme chas nos !

Mas veiquí qu’en 1931, per los besunhs d’una bevenda gasosa, m’an vestit de roge ! vesètz lo compte ! e lo Bonòme Ivern tot verd es devengut le P..

- Cal pas zo dire, a dich lo Pitit Chaperon roge, quò podriá donar de las idéias al lop !

Lo Bonòme Ivern a sobecat lo cap. A baissat los braçs tanben. Una tristor blanca sus sa jauta. A fach :

- Fai vertadierament caumos per la sason !

Puèi nos a saludat, a tornat al recobde del magasin de juguets, aquel que fai lo caire.

Estranh Nadal, fasiá caud a Peirigus. Pas caud coma en estiu, mas d’aquesta calor a vos opressar un pauc, a vos far damandar : Mas que se passa ?

Daniel Lhomond, revirat en òc per Joan-Pau Verdier