"Tragèdia urbanistica" per Felip Frens
Veiqui un texte mandat per un noveu contributor, Felip Frens de Veirinhac. L'i soetam benvenguda sur Rubrica en òc!
°°
Sabi pas se ne cal rire o plorar.
Tot començèt a la debuta del sègle aquel dimenge d’abrial que lo Lafarga s’encolerèt e me fotèt defòra.
Veniái de tustar a la pòrta de son ostalàs per demandar la man de sa filha. Emplegui lo mot « ostalàs » per descriure lo tresmudament d’aquel brave ostal.
Aviá auçat la bastissa dètz e uèchena d’un estatge, tombat la teulada vielha per far pausar de las ardesas falsas, puèi encastrejat de fenestras de plastic blanc que te podiás veire lors tampas escrincelar de luènh.
Rai, aviái pas cent sòus dins la pocha d’aquel temps. E mai que la Laureta m’aimèsse pas pro per resistir a son paire, de la desvistar cada jorn pel fenestron me venguèt intolerable.
Decidiguèri d’anar cercar fortuna a la vila e de ne tornar pas avans que poguèssi avisar lo Lafarga d’ennaut.
Mentretant, l’entreprenaire de trabalhs publics s’èra botat al cap del conselh municipal.
Monsur lo Conse volguèt infligir a sa comuna ço qu’aviá fach a son ostal : quicòm modèrn.
Caliá que la carrièra principala s’alarguèsse per aculhir mai de monde, crear de l’espaci per acantonar lors veïculs e aital favorizar lo comèrci.
Las palejairas palejèron tota una mesada e la maisoneta de mos aujòls dispareguèt mentre que la riba nòrd de la caussada sus cent cinquanta mètres.
Nòstre vilatge s’en remetèt jamai pus. Dels estajants novèls venguts de la vila procha per s’albergar a prètz bas acabèron de lo descarar .
La Laureta, venguda grasseta a dich de manjaquejar en gaitar la television, podiá pas durmir amb lo bruch del trafec tant mai que lo lum novèl de senhalisacion clucatejava cap a sa cambra.
Aquel lum li foguèt fatal : un camionàs l’espotiguèt mentre que traversava la carrièra. Pareis que lo fuòc s’èra encalat sul verd.
Ara qu’èri amonedat, jurèri de me venjar del Lafarga.
Crompèri una pèça bèla de terra encara liura dins la carreiròta que davala al miègjorn de son ostalàs. L’òme s’i èra retirat de la vida activa e de la politica per fenhantejar sul bòrd de sa piscina al mitan de l’òrt.
Qualques envelopas plan confladas se perdiguèron pas dins d’unes burèus avans que ma tòrre ne sortiguèsse de tèrra. Quaranta apartaments de luxe cap al sud !
Los d’ennaut se vendèron plan plan car que se podiá apercebre la mar amb una brava luneta per temps clar.
Me’n soi gardat dos a la cima per ne far un, cal viure confortablament ço disiá mon amic lo conse novèl en espiar lo Lafarga a l’ombra del bastiment.
D’ivèrn, l’entreprenaire vesiá lo solelh sonque avans que se colque.
Moriguèt sul ubac.
Felip Frens
Lien permanent
Catégories : Cronicas d'autors
La préparation de la quatrième édition de La Ranversada de Vergt des 15, 16 et 17 août est dans la dernière ligne droite. Philippe Burey, son fondateur nous en présente les grandes lignes. « La Ranversada , quo es una associacion lei de 1901, a l'entorn de tres personas e quauquas benevòles. Lo principe es simple : la jornada avem set talhiers de pratica de chant, de dança e d 'instruments tradicionaus : violon, viela, chabreta, acordeon diatonic per mai de quatre- vint estagiaris.E chasque ser, un festivau, concert, baleti. La programmacion es eclectica e vai de la musica tradicionala occitana au jazz, folk-rock, chanson francesa...Questa annada, fasem onor a Marc Perrone, l'òme que a benleu sauvat lo diatonic en França que sera companhat de jugaire que coneis ben coma André Minvielle e d'autres grands musicaires . Lo dijuòu 15 , a Neufonts-Vergt, auram un balet a la votz coma lo duò Madièrs, puei dau trad emb La Forcelle e Faburden II, mai Eskelina fara onor a la chanson francesa , l'entrada es de nonmas 10€, possibilitat de minjar sur plaça , de reservar au 0550078792. Lo 16 auram lo duo Corbefin-Marsac, Gargamas e un « buòu » daus musicaires a Bourrou, entrada gratis, merchat biò. E per 'chabar, lo dissabte 17 , a Neufonts-Vergt, bal a la votz emb Nhiac, folk-rock per Solvända e lo grand concert Marc Perrone/ André Minvielle e lors amics. Entrada 18€, possibilitat de minjar sur plaça, de reservar au n° qui-dessur. Volem far tanben quauquaren per tornar botar la lenga dins la vita de tots los jorns : en jornada, i aura dau estagis coma los escolans per Daniel Chavaròcha, Laurenç Labadia et Christophe Célérier, lo repas per los estagiaris preparats per l'associacion seran servits jòs lo merchat vielh, per fin de far petar la lenga au cor dau borg. ».Si vous voulez en savoir plus, réserver, contactez Philippe Burey sur 
307 47 85
