Pendent una convalescéncia, òm se damanda daus còps coma quò vai virar, si òm vai ‘chabar per garir… mas lo sosten de tots los amics occitans vos tòrna la confiança e òm se ditz : « Quò se vai ben ’dobar, queraque ! »

D’aprep Chabaneu, « queraque » ven dau latin hoc erat quod (quò era que). La fòrma correspondenta en Naut-Lemosin, ente « eria » correspond a « era », es « queriaque ». E nòstre lingüiste nontronés explica coma lo –a de « era » es vengut long e accentuat.
Mas çò que m’interessa lo mai es pas tant l’origina, coma lo sense e la valor expressiva de « queraque ».

D’en prumier, fau remarcar que « queraque » se tròba mai que mai siá au començament d’una frasa declarativa que pòt exprimir un dobte :
« Queraque, tainaram pas lo trobar, lo pitit dròlle » (Enric Delaja, Jan Picatau de Sent-Barrancon)
siá a la fin :
« Voletz pas vos en anar, queraque. » (Enric Delaja)
L’intonacion monta dins la partida principala de la frasa, coma dins una question, monta-davala sus « queraque ».
Los lexicografes de linga lemosina (crese pas que « queraque » se tròbe dins los autres dialectes) prepausen de las reviradas que varien gaire :
Chabaneu : sans doute
Jardric : sans doute
Daniel : sans doute
Pagnoux : probablement, sans doute, il faut croire
Lavalada : vraisemblablement, sans doute
E, dins Lou Tresor dóu Felibrige, Mistral dòna : 
QUEREIQUE, QUEREQUE, QUERIAQUE, QUERAQUE (perig.), conj. : apparemment, sans doute, il est à croire que, en Limousin.
e ajosta : « En Provence, on emploie crese que dans le même sens ».
Veiquí lo tres exemples que dòna Mistral per esclarar lo sense de « queraque » :
Queraque l’odor me ’flatet (Focaud)
Queraque tu voles qu’òm se coige dabora (Almanac lemosin)
Ne voldrias pas queraque desplaire a ton notari (Chastanet)
Lo degrat d’incertituda de « queraque » = sans doute es mendre que dins « benleu » = peut-être. Òm pòt dire que « queraque » supausa sovent una part d’optimisme. Per exemple, quand nòstre Jan Picatau ’rieba a París e que, gaire espaurit, entrepren de cherchar son cosin dins la granda vila sens sapcher son adreça, eu se ditz :
« Lo trobarai ben, queraque. Doas personas se rencontren mielhs que dos termes. »
Dins los exemples los mai recents, l’evolucion dau sense fai que, aura, « queraque » vòu dire : « Espere ben que… ». Quo era entau que s’emplueia emper chas nos e quo es la valor que ieu contunhe de li donar.
« Queraque òc-ben » (prononçat *que-ra-cò-bè), « queraque òc-plan » son de las locucions d’afortiment (affirmation). Disen la certituda d’una persona que respond au dobte de son interlocutor. Si quauqu’un vos damanda :
« Lo coneisses, ’quel òme ? 
respondretz benleu :
– Queraque òc-ben, lo coneisse ! Som vesins ! »
Per vos, la responsa es evidenta, ne’n setz talament segur que setz estonat que òm vos pause la question. En francés, las locucions equivalentas sirian : « Je pense bien ! » o ben « Et comment ! ».
« Queraque, quò se ’dobará ben, ’quel afar ! 
– Queraque òc-ben ! »

A Javerlhac, lo 24 de feurier de 2018
Jan-Peire Reidi