Voici un extrait d'une oeuvre d'Auguste Chastanet, l'un des fondateurs du Bornat dau Perigòrd et disciple périgourdin de Frédéric Mistral.

°°

L’ange dau darnier jutjament

Dins sa trompeta redotabla

Un jorn bufará talament

Que los mòrts de tota la terra

Que jos la tomba fan lur som

En s’esvelhant dins lur possiera

S’auviran nomar per lur nom.

E quand, enfin, mon torn vendrá,

Lo rei dau ceu e de la terra,

Los uelhs lusents, apelará

Lo curet de Peira-Bufiera.

E li dirá : Curet, curet !

« Qu’as tu fait de quelas ovelhas

« Que te balhí de mon braç drech

« Per las acelar jos mas trelhas ? »

Laidonc, mos frairs, tot interdich,

Io me farai pitit, pitit,

Coma fau dins questa chadiera ;

Mas lo Bon Diu dirá pus fòrt :

– « Au ! Curet de Peira-Bufiera,

« Que vas estre jutjat d’abòrd,

« Qu’as tu fait de quelas ovelhas

« Qu’un jorn te balhí

« Per las acelar jos mas trelhas

« E las tochar en paradís ? »

E l’auviretz tonar. Quau tremble

Que vos prendrá totas ensemble !

E lo diable esbraseiará

Son grand fogier de boesc de braça

Quand lo Bon Diu me perçará

De sos uelhs que fonden la glaça.

A ! fuguessa io mut ! Pasmens,

Faudrá ben que io li responde.

Per io mai per vos quaus turments

Jos los uelhs de tot aqueu monde !

Voldriá sautar rejas e plais,

Mas sirai ben forçat, mos frairs,

De segre las rotas planieras,

Li dirai alaidonc : « Un jorn,

« Senhor, béstias me las balhèratz,

« Béstias vos las tòrne, Senhor ».

Transcription par Jean-Claude Dugros en graphie normée.