Diluns 3 de julhet, Peire Janalhac, mera de Sent Abre ( Tocane Saint-Apre en francés) convidet los abitants de la comuna, los elegits e las associacions per dos eveniments a l’entorn de la cultura occitana dins lo ranvers de la vau de Drona.
D’en prumier, l’edila confirmet que Sent-Abre fuguet chausida per organisar l’edicion 2024 de la Felibrejada, en presença de Christel Grégoire, Presidenta dau Bornat dau Perigòrd. Quò se fara emb l’ajuda de las comunas dau ranvers, maitot las comunas de l’ancian canton de Montagrier e de L’Esla, Mencinhac, Sent-Meard de Drona. Lo mera desira que la Felibrejada de Sent-Abre sia l’afar de tot lo monde, associacions, benevòles, elegits, artistes, actors economics dau ranvers : tots se pòden apropriar l’afar per ne’n far un succès popular. Lo trabalh de preparacion vai començar e una prumiera amassada de trabalh sera leu organisada en setembre. Melania Celerier, Conselhiera departamentala dau ranvers e artista occitanista plan coneguda, faguet saber son estambòrd per l’eveniment e assegura li aportar tot lo sosten possible.
Manièra de lançar l’afar de la Felibrejada, la meraria decidet de nonmar l’esplanada entre l’Ostau Paradòu e la sala de las festas dau nom de placeta Joan-Pau Verdier, en presença de Marçau Peironin, professor d'occitan, amic e partenari de Joan-Pau sur França Blu Perigòrd e que representava sa familha. Entau fasent, l'artista tròba sa plaça e fai lo ligam entre dos luòcs de cultura ( la mediatèca Jean Macé e lo museu dau costuma) e d'espectacles.
Crestian Daverat, conselhier municipau en charja de l’adreçatge rendet un omenatge plan personau e inspirat au famos autor, compausitor, chantaire, cronicaire ( eca!) perigòrd que descubriguet dins sa jòunessa. Expliquet son accion remirabla per far passar la cultura occitana dins lo monde d’aüei. Una placa especiala, creacion de fer, fuguet revelada per Christel Grégoire, Melania Celerier e Peire Janalhac. Pòrta lo texte en occitan: « Joan Pau Verdier, trobador de nòstre temps ». Alaidonc, aura, "i a una plaça que pòrta ton nom".
Lo prumier magistrat faguet remarcar la continuitat de l’accion de mesa en valor de la cultura occitana, començada per Micheu Debet, ancian mera de Sent-Abre, conselhier generau e « deputat daus picadis » que fondet lo museu dau costume de Sent Abre coma Gineta Valpremi ,membre dau Bornat dau Perigòrd,e que chausiguet de donar a doas ruas importantas dau borg los noms daus trobadors perigòrds dau ranvers, Arnaut Daniel e Arnaut de Maruelh.
Lo monde present son demorats un bon moment a platussar e an començat de prener data per diferents projects, las idèias espelissavan de pertot !
Denis Gilabert
Pour Chança en Òc, les premières journées occitanes de Chancelade Joan-Pau Verdier sera mis à l’honneur. Tout un programme avec accès gratuit!