Dempuei lo 23 de setembre, çò-ditz lo calendier, sem oficialament entrats dins la Darrièra, l'autòmna, si aimatz mielhs. Quò era l'equinòxa d'autòmna, la debuta de la darriera sason viventa avant l'ivern. Pareis que du punt de vista de la meteò, dins l'emisfèri nòrd, sem desjà en autòmna dempuei lo 1er de setembre... Ai fach ma vendenha, que me sembla bona e que comença de bulhir. Ai chabat las darrieras prunas Senta Catarina, ai ben minjat quauquas fijas, quauquas nosilhas, ai començat de massar mos cacaus, mas ai totjorn pas trobat de botareus. E totjorn pas d'aiga. E gaire de vent. Quò es « L'estiu indian » chantet Jò Dassin, l'estiu de la Sent-Martin chantet Brassens dins « Saturne ».

Flors d'autòmna
Passat-ier , ai agut una surpresa : mon cirier tòrna flurir ! E mai, de las fuehas novelas venen d'espelir ! De segur, son pas bravas coma a la prima e faran benleu pas de fruchas, mas bon quò es lo prumier còp que zo vese. Mon paubre vielh aubre es un pauc coma io, completament perdut dins la sasons. " Son pas òrras, las flors d'autòmna ; E tots los poetas l'an dich ; Si te viese, coifa que gona ; T'assegure qu'an pas mentit ", entau reviret Jan dau Melhau la chançon de Brassens dins son espectacle e son libre. Si de pensar aus braves piaus pebre e sau de mon aimada, quò me fai plaser, sei pas segur que quelas flors sur mon cirier son de bon astruc per l'avenir de mon aubre que manquet d'aiga tot l'estiu durant. Aviam desjà l'ametlier "que fai de flors blanchas au mes de genier " dins "Se canta", mais coma ditz Micheu Chapduelh dins son libre "Des mois et des jours", sei segur que mas flors « niran pas au panier ». E quand vese mos paubres chastanhs, sens fuelhas, emb los pelons voides, me dise que òc, lo climat chamja e que son benleu pus adaptats a la terra onte son nascuts.

Saturna
E dire que i a totjorn dau monde per pensar que l'eschaurament climatic es una neçaria...Questa sason, octòbre, quò es ben lo mes de Saturna, quitament quora lo temps sembla brave. "Es mornaros, borrinos, sorne ; Governa los afars dau temps ; Amai d'un brave nom s'adorne ; Saturna, es dieu migregent".

Brave temps au meschant moment es benleu pas totjorn una bona novela per l'avenir.

Denis Gilabert

Joan-Pau Verdier e Nicolau Puech nos informan que lo convidat de l'emission dau diumenc 7 d'octòbre 2018 a 11 oras sur França Blu Perigòrd sera Guilhem Lopez per parlar dau noveu CD que ven de surtir coma son amic Clamenç Ros : "Canard Isard" dau duò Thoux Azun.

Meitat chen , Meitat pòrc , chasque diumenc a 11 oras  sur França Blu Perigòrd!

Per escotar l'emission en directe o en redifusion, clicar sur lo ligam: França Blu Perigòrd

Veiqui lo ligam vers lo site de Joan-Pau Verdier

e los ligams vers lo sites de Nicolas Puech:  www.nicolaspeuch.com e facebook.com/nicolaspeuch

Pour sa soirée de rentrée, le TCO reçoit Jacme Lacoste qui viendra parler des abeilles et du miel.

Rendez-vous jeudi 4 octobre à 20 h 30 au café associatif Les Thétards, 7 rue de la Bride à Périgueux.