Divendres passat, aviá rendetz-vos a la fiera espausicion de Perigüers e ai viscut un bon moment de pas creire. Coneissetz benleu lo Piaron Folharet e lo Nadau Ribeiròu de Las Belutas dau Canton de Moissidan. Eran quí, tots dos, Piaron 89 ans mai Nadau 86, l'acordeonista emb son pitit diatonic Mengascini e lo chantaire e dançaire coma sa femna Joana, eran quí per far dançar lo monde de la fiera sur l'estand dau Bornat dau Perigòrd.

Podriam pensar qu'a lor atge, aurián benleu agut quauquaren mai de far, mas pas dau tot, eran venguts plan bien 'bilhats. Piaron aviá portat son chareton plan ben calculat per botar son instrument e se sietar "e botar 'na roquilha en estiu", emb daus pegasolets "occitan". Me parlet de son molin, de sa familha, era sejaire de mestier. L'aviá vist un còp far daus sketches coma sa femna sur scena. Parlet de son "mentor" Marcel Piaud, de son plaser de jugar de las danças tradicionalas, daus instruments... A format daus jòunes come Nicolau Puech. Nadau, se, era maçon de mestier. Es membre actiu dau talhier de lenga de Sent-Laurent-daus-Urmes. Escriu e ditz daus textes en occitan, chanta plan ben e es un dançaire de prumièra bora. Son cosins, quilhs dos òmes. E son daus vertadiers passaires de lenga e de cultura, d'un biais simple, pròpche. Dins un monde de mai en mai complicat, barrat, egoista, son la pròba viventa que podem viure d'un autre biais, una novela pròba que la musica, lo chant, la dança fan lo monde melhor e fan venir vielh d'un bon e brave biais.

Damandatz a Piaron de jugar una pita borrèia ? Zo fará, còp-sec : los dets enquera lertes corren sur los botons. Damandatz "La gerba bauda" a Nadau ? Entau fara. Una pita chançon a dos ? Pas de problema ! E totjorn aimables, disponibles, modestes...Uros e que nos fan uros. Fan ço que fau. Son « Los de qui cau », coma ditz en gascon lo grope Nadau. Crese qu'an totjorn estat entau, semblan aver quinze ans: l'espiada maliciosa, lo rison a la pòta, totjorn lo mot per rire. Son virats devers los autres, pas devers se-mesme. Te fan viure un bon moment. An de las chausas interessantas a dire. Sabe que son mai d'un, los que son entau en Perigòrd, que se son jamai plantats de parlar occitan e pasmens parlan plan ben francés, qu' an jamai renegat ço que son e zo vòlen partajar. Donan per far plaser e se far plaser. E ben continuatz entau, jugatz, chantatz, dançatz, parlatz, si 'os plai ! Setz daus exemples per n'autres, jòunes mai vielhs. Vos saludem ben bas, Piaron e Nadau !
Denis Gilabert.

Voici un lien vers l'émission consacrée par France 3 sur le sujet, dans les classes de Martial Peyrouny au collège/lycée Bertran de Born a Périgueux.

A ne manquer sous aucun prétexte et à faire tourner sur vos réseaux!

http://france3-regions.francetvinfo.fr/nouvelle-aquitaine/dordogne/plus-plus-eleves-seduits-occitan-dordogne-1329037.html

Joan-Pau Verdier e Nicolas Peuch nos informan que l'emission occitana dau diumenc 24 de setembre 2017 sur França Blu Perigòrd se debanara excepcionalament a 14 oras en directe de l'estand dau Bornat dau Perigòrd a la fiera espausicion de Perigüers a Marçac d'Eila.

Lo convidats seran "Los Caps Negues" de Bazas que seran en concert lo 7 d'octòbre a la Filatura de Perigüers per una serenada Cabaret òc, organisada per Lo Bornat.

Meitat chen , Meitat pòrc , chasque diumenc a 11 oras  sur França Blu Perigòrd!

Per escotar l'emission en directe o en redifusion, clicar sur lo ligam:  França Blu Perigòrd

Veiqui lo ligam vers lo site de Joan-Pau Verdier

e los ligams vers lo sites de Nicolas Puech:  www.nicolaspeuch.com e anemtrio.com e facebook.com/nicolaspeuch