Comprene pas quel afar d' « influenza aviara » e las consequencias de mesuras dichas sanitarias. De que parlam ? D'un virus, probablament d'origina d' Olanda, d'Alemanha e d'Irlanda, que venguet chas nos per los auseus migrators dins un jalinier de particulier, tuet 20 polas sur trenta. Còp sec, las autoritats decidèren lo confinament de la polalha, daus canards, de las auchas...emb un bon resultat, que aura, sur tot lo grand Sud-Oest, i a nonmas 69 cas sur una population de centenas de milliers. Podem laidonc pas parlar de pandemia e vesem que la proteccion foncciona plan bien dins quela filiera d'excellencia. Fau tornar rampelar que lo virus passa pas a l'òme e que de tot biais, far cueire la bestia lo tua, queu virus.

E ben quo es pas pro.Non gran.

Lo govern francés, jos pression de l'Euròpa bòta en plaça un « voida sanitari » dau 18 d'abriu au 16 de mai, mai per los que gorjan canards e auchas dau 2 de mai au 4 de julhet. Tot quò-qui deuria costar 130 millions d'€ a la França e l'Euròpa, a nosautres, qué. Mas quo es pas enquera chabat. Per pas que quò tòrna, (que sabetz, los auseus migrators, quò monta quò davala, en mai de quò, lo virus muta...), van segre tot un fum de « mesuras de bioseguritat »ço-ditz, valent a dire de nòrmas, de paperassa, de tracassarias administrativas e de sòus ( investissements, quò fai mai serios) que estiman a 220 millions d'€ sur 5 ans. Totau 350 millions d'€ per 69 volalhas crebadas. Quò fai char la bestia, quitament trufada. Los elevaires comprenen pas quela « subre-reaccion » sur un problema fin finala desja reglat. E quò-qui, nonmas per nòstre Sud-Oest. Que se passa alhors ? Tot es pròpe, de segur ! Que vai se passar emperaqui ? Pas de vendas de canards e auchas sur plaça, aus transformators, perta de venda a l'exportacion, emplejats botats au chaumatge tecnic( quo es n'autres que paian) e quantben d'elevatges van dispareisser, non pardon, « se concentrar » ? Urosament, per tornar començar la produccion, van far venir daus poletons e entre temps daus tirons gorjetats de Ongria o de Turquia...onte tot es perfach, jos contròlle, quo es plan conegut. E quo es bon per nòstra balança comerciala, qu' a pas mestier de quò. Las consequenças non-sanitarias de l'afar seran de segur importantas, subretot per los petits elevaires. Quo es la debuta de la fin de l'elevatge en plen aer. "Ils nous pourrissent la vie en voulant nous la sauver"ço-ditz lo grope Nadau. Benleu ben.

E esperatz : vos tòrne dire que l'afar comencet dins un jalinier de particulier et sur de las polas, pas daus canards. Mesfiatz-vos, benleu doman, quo es vòstre jalinier que vos van far barrar...Chabat lo jalinier d'autres còps. E quilhs auseus migrators, que portèren la pesta ? Van-t-ilhs lor impausar un voida sanitari a ilhs tanben ? O benleu un corredor sanitari per volar ? Quand la machina ven fòla, degun pòt l'arrestar. A, si podiam decidar un voida-sanitari de la neçaria... Mas coma disia l'autre "Vaste programme".

Denis Gilabert.

Joan-Pau Verdier e Marçau Peironi nos informan que lo convidat de l'emission de diumenc 28 de feurier a 11 oras sur França Blu Perigòrd sera Patric Ratineaud de l'Union Occitana Camila Chabaneu per parlar de « l'Enchantada », la jornada dau chant que se debanara lo 10 de març a Nontron.

Meitat chen , Meitat pòrc , chasque diumenc a 11 oras  sur França Blu Perigòrd!

Veiqui lo ligam vers França Blu Perigòrd

e lo ligam vers lo site de Joan-Pau Verdier

La Cloucaude (Prigonrieux) : c’est de l’excellent occitan, « la clocauda » (prononcer / lo cloucaoudo/) désigne une couvée, une troupe de poussins, une engeance, une famille, de l’occitan « cloca », poule couveuse, mère poule. Désigne ici, d’un ton familier, une dame à la tête d’une nombreuse famille…

Jean-Claude Dugros