Divendres 5 de julhet, coma a chasca felibrejada dempuei cinc annadas, Lo Bornat dau Perigòrd convida los escolans per una jornada especiala. De segur las escòlas publicas, privadas e la Calandreta Pergosina dau ranvers de Perigüers, mas en mai de quò, los collegis de Dordonha que seguen l'option occitan, passen una jornada a gratis. Chasque grope es aculhit per daus benevòles plan gentes que lor fan descubrir los estands daus òmes de mestier, los artisans : factors de viela o d'arcs, mosnier, belhaires eac. que se trobavan plaça Mauvard o b'etot plaça dau Thouin. An pogut tastar lo jus de poma freschament traulhat, an pogut visar de pres los vielhs tractors, la batuerza, tos los utilhs per la vinha venguts dau sud dau departament.A chasque còp, an trobat dau monde plan plasent per balhar las explicacions

Daus espectacles e de las expausicions

Dins l'espaci François Mitterrand, L'Agencia culturala departamentala avia amenajat  « l'òrt daus trobadors », emb una vesita menada per Joan-Francés Gareyte, una expausicion sur l'occitan, lenga daus trobadors. A l'acialat daus aubres, los escolans podèren auvir daus contes bilingües per la contairtitz Monica Burg e se laissar portar per son imaginari. Puei, an assistat a un concert de Romain Baudouin, vengut de Biarn, que juguet un instrument, boiradis de viena e de guitara electrica, amplificat. Presentet en musica diferents animaus que los collegians devian trobar.

Un moment de chant e de dança

Apres aver trauchat la ruas e charrieras de Perigüers, se'n aneren vers lo parque Gamenson per marendar mai chantar e dançar sur la musica daus Goiats, valent a dire Gilles de Becdelièvre e Nicolau Puech. Cercle circassians,scottishes, rondeus, borreias, brisa-pès...tot lo monde se boteren de dançar maugrat la caumassa. Apres quò, demoret un pauc de temps per far visitar las ruas e plaças de Perigüers e se botar a l'acialat per prener una glaça o beure un còp, avant de tornar au bus.

Escolans e ensenhaires deven grandmercejar lo Bornat dau Perigòrd per queu moment de rencontra que nos balhan a chasqua felibrejada.

Denis Gilabert.

Bernard Sendrès, president dau Bornat dau Perigòrd, nos presenta las grandas linhas de la granda festa occitana annadiera de Périgord que ven a Perigüers pour lo 6esme còp dempuei sa creacion.

« La felibrejada se debanara sur tres jorns, dau divendres 5 au diumenc 7 de julhet, en centre vila de Perigüers. Totplen de monde se son mobilisats per far de l'eveniment una reüssida.

Divendres 5, lo jorn de las escòlas

« Daus eslevas de las escòlas publicas e privadas de Perigüers e de la CAP, de la Calandreta mai daus collegians occitanistes venguts de pertot en Dordonha son convidats a gratis per aquela jornada, en tot mai de 1200 jòunes. Quela jornada es plan importanta per nosautres, que volem far passar la lenga aus pus jòunes. Van descubrir los artisans, los vielhs mestiers e faran daus talhiers de dança de chants, visita dau vergier daus trobadors coma Joan-Francés Gareyte, contes coma Monica Burg, un concert baleti coma Romain Baudoin de Familha Artus...A 18 oras, los escolans de Perigüers e Corsac faran lor espectacle, avant lo bal a gratis a 21 oras coma « 3615 Tout Court », plaça de la Clautre. Per chabar la serenada, Peiraguda e Brass Office faran un concert au parc Gamenson a 21 oras ( entrada 10€).

Dissabde 6, vila duberta, accès liure

Apres los merchats abituaus lo matin, podretz veire l'apres-mieijorn, los artisans e los vielhs mestiers plaça de la Clautre e Mauvard. A 11 oras puei a 14 oras, Maurici Moncozet e Bernat Combi van interpretar « Marcela Forever », lor espectacle sur l'òbra de Marcela Delpastre. A 15 oras, quò sera lo « Cant'òc et cont'òc », plaça de la Clautre e la visita dau « Vergier daus trobadors » a l'espaci culturau. A 15 oras 30, una conferencia sur l'occitan coma Guy Mandon et Gérard Fayolle, de las visitas guidadas de la vila en occitan e en francés per le Service d'art et d'histoire e la mediatèca...Totplen de chausas : talhiers de dança, conferencias, omenatge a Claudi Seignolle per Joan-Claudi Dugros...e a 21 oras, concert coma Lou Dalfin, au parc Gamenson ( entrada 10€)

Diumenc 7, animacions, passa-charrièras, taulada e cort d'amor

De segur, i aura totjorn los artisans, los vielhs mestier, lo merchat de productors. La dubertura se fara a 8 oras, entrada paianta 6€ per persona ( a gratis per los – de 12 ans). Tres passa-charrièras ( défilés) se faran emb los gropes tradicionaus. A 10 oras 30, la messa sera dicha a la catedrala sent-Front. Apres los discors oficiaus sur las alèias Tourny, quò sira la taulada ( 26€ sur reservacion au 0553028217) e a 15 oras, la « Cort d'amor » au Parc Gamenson ». Après 18 oras 30, l'entrada sira liura ».

Un programa plan riche que ne'n podetz tornar trobar lo detalh sur : https://perigueux.fr/perigueux-au-quotidien/animation/1000-2019-la-felibree-a-perigueux.html

Denis Gilabert.

Fotò: la jornada dau divendres per los escolans es totjorn un moment per ne'n saber mai coma las gent de mestier ( aqui, los belhaires en 2018 a Sent Cibran)

La librariá de l'ASCO drubira lo dissabte 4 de mai de 10 oras a miègjorn e de 2 a 5 oras de la vesprada, sala de l’ASCO dins l’annèxa de l’escòla Jules Ferry.
Al plaser de vos encontrar.