Octele.com ven de botar en linha la responsa que Joan Pau faguet a la question: "Çò qu’es l’occitan per vos ?" a la fin de l'annada 2019.

Un plaser de lo tornar veire e auvir.

Clicar qui aprep: https://www.octele.com/Lenga-c-lenga-c-r-joan-pau-verdier_fiche_3636.html

Meschant prumier jorn de l'estiu, Joan-Pau Verdier defuntet lo 21 de junh. Sera enterrat dimecres 24 de junh au cemeteri de Chancelada a 4 oras de l'apres-mieijorn.

Veiqui l'article de deser dins Sud-Ouest: https://www.sudouest.fr/2020/06/21/dordogne-l-artiste-occitan-joan-pau-verdier-est-decede-7584431-6048.php?utm_source=newsletter&utm_medium=email&utm_campaign=MaNewsletterPerigueux&utm_term=20200621

De mai, veiqui dos textes de chançons de Joan-Pau: "L'eissarpa de fuòc" e "Rencontras de bal", sa darriera chançon,  que Joan-Pau compauset e chantet coma Nicolas Peuch, dins son CD eponime.

Fotò (DG): Joan-Pau Verdier au moment de sa cronica setmaniera sur Meitat-chen, meitat-pòrc.

L'Eissarpa de fuòc

Quò es per tu Loïsa, per uèi e doman,
Tu la femna a l’eissarpa de fuòc
Color de cerièsa e perfum de pan,
Sabe pas perqué te dise ’quò

Femna en plors a espiar lo regard del mond’
Femna nuda dins l’ivern prigond
I a pas cap de plaças a portar ton nom,
Mas benlèu mielh vau ’quela cançon

Un bèu jorn veirem la pica del solèlh
A cadun son tom, cadun l’esper
Per sentir aqui coma lo vin novèl
La cançon de Loïsa dins lo ser.

Rencontras de bal

La musica, quò’s una rencontra,

La rencontra emb d’autres musicaires, d’autras amistats;

Dempuèi lo que t’a apres a jugar e tots los autres per lo plaser de jugar.

La musica, quò’s una rencontra, de dançadis en balétis,

De seradas negras en nuèits falordas.

La musica quò’s un partatge, un paratge, una partença,

Puèi que la musica, quò’s la vita.

La musica, quò’s una rencontra,

Una rencontra entre solelhada blava e luna nejada.

Una sadolada quand sèm pas tot sols…

Quò’s una pausa e mesma un sospir,

Quò’s lo silenci que risola e s’espofida.

E per lo còp, vos lo disi, vos lo disi:

Pas de musica sens silenci.

Se rencontrar, quò’s se trobar.

La musica, quò’s coma daus goiats que se son trobats.

A la darriera amassada generala, Tomàs Hirondelle fuguet elegit coma president de l'association Novelum , seccion perigorda de l'Institut d'Estudis Occitan, en remplaçament de Joan-Lois Leveque, que demòra evidentament dins l'associacion, coma membre plan actiu.

Tomàs es professor d'istòria e de geografia mai d'occitan e demòra a Perigüers. L'i soatam plena reüssida dins sas novelas fonccions.

Veiqui , qui-dejos, una declaracion dau noveu president

 °°

Brave monde bonjorn,

Dempuei lo 30 de mai, Joan-Loís Leveque decidiguet de laissar la man de la presidéncia, aprep 12 ans d’un trabalh subrebeu e remirable (que vai persegre totparier !), e que lo mercejam fòrça per aquò. Sei aura lo noveu president de l’associacion Novelum, que ven de festejar sos 50 ans i a gaire.

Sei fier e onorat d’aquela fisança e eissairai de persegre lo pretzfach qu’es estat menat per mos predecessors .

Dau vòstre costat, si avetz de las idèias o de las remarcas de far, tesiquetz pas ! Eissaiarai, emb las constrenchas que son las miàs de far tot çò que pòde.

Pasmens, crese mai a l’accion collectiva que non pas a la d’una sola persona, quand quò es possible. Quò es per quò que vos convide a passar a l’accion si n’avetz l’enveja e lo temps, e a subretot ne’n parlar a l’entorn de vos e aus autres sòcis de l’associacion. Una còla de dos o tres o mai, quò es mai estimulant e plasent.

Per çò qu’es de mon accion, en defòra de contunhar las activitats desjà engatjadas, vau eissaiar de desvolopar la comunicacion de Novelum e de sas accions (talhiers, socializacion ...) per fin de las melhor far coneisser e de las far frotjar, dins l’esper de formar totjorn mai de locutors e de simpatizants de la nòstra lenga, tot quò-quí dins un ambient d’amistança e de convivialitat.

Vos mercege de m’aver legit e vos envòie mas amistats militantas,

Tomàs Hirondelle

thohiron@gmail.com