https://www.octele.com/Oc-veituratge-bola-cristau_fiche_3704.html

Imaginatz que devètz anar de Peirigüèrs duscas a Tarba. Anatz sus un site de coveituratge e vesètz que Miquèu a de plaça per vos.

Un sauvador ! Enfin calrà primièr dintrar dins lo monde estret, reac e masclut d’aquela granda maissa qu’es Miquèl. Pas simple se sètz feminista, vegetarian, altermondialista o se fasètz concurréncia al conductor dins son intolerància.

Tot lo monde parlan la meteissa lenga dins la veitura, mas pas totjorn lo meteis lengatge. Fa pas res ! Serà una arena, un lòc de combat verbal e benlèu… arribaretz a destinacion !
ÒCveituratge ! un programa cortet en occitan que fa rire e circular…las idèas.

Dins aquesta segonda sason Miquèu a tornat trobar son permís. Mas coma a perdut son trabalh cèrca a ganhar de moneda en fasent de coveituratge. Fa pagar tot lo monde, tanben sa familha.
Ça que là, malgrat son cinisme, sos manipòlis, la frequentacion de personas vengudas d’un autre monde que lo de sas conviccions pregondas l’obliga a se pausar de questions. Tanben sa dificultat a trobar un emplec li fa comprendre que lo monde es benlèu pas çò que crei. Torna metre en plaça sas relacions familialas e descobrís amb d’unes passatgièrs d’idèas e de valors qu’ignorava.

Realizacion : Laurent Labadie

Una produccion Mara Films, coproduccion ÒCtele / France 3 Novèla-Aquitània, amb lo sosten de la Region Novèla-Aquitània e del Conselh Departamental de Dordonha.