Nicolau Puech nos informa que l'emission es suspenduda pendant la periòda de confinament. Podetz totjorn tornar trobar las emissions precedentas sur lo site de França Blu Perigòrd.

L'émission dominicale occitane de France Bleu Périgord, Meitat-chen, meitat-pòrc est suspendue pendant la durée du confinement.

Les émissions précédentes peuvent toutefois sur retrouver sur : https://www.francebleu.fr/emissions/meitat-chen-meitat-porc/perigord

Aüei, per mai d'un mera e lors conselhiers municipaus, quò es lo jorn de l'eleccion. Per daus uns, vai faller esperar una setmana de mai...e fin finala benleu lo mes de mai, perqué far ? Per plantar lo mai ! Coneissetz de segur la chançon de Peiraguda: « Plantèm lo mai, plantem lo pinhier, davant l'ostal, plantem lo mai, plantem lo pinhier, de mai en mai ». Son autor, Patric Salinhier nos explica totas las occasions de plantar lo famos pinhier : las eleccions, los maridatges... Aura, lo mai sovent, quò es per onorar los conselhiers recentament elegits. Los de mon ranvers me convidan per plantar un mai « collectiu » emb una corona e tant de drapeus que d'elegits pincats a la cima e de mai en mai sovent, un drapeu occitan. Fasem une fotò, la populacion se tròba au vin d'onor, quò es un bon biais de se tornar trobar e de « lançar l'afar » de la novela mandatura, una bona « comunion republicana ». Avem pas tant d'occasions de passar un bon moment ensemble e lo monde d'emperaqui i tenen.

De segur, autres còps, plantavan un mai per chasque conselhier e lo monde fasian ripalha, benleu mai que aurian degut, quò durava sovent tres setmanas de temps, quò se fasia pendant la dimenjada. Quand pausam la question « D'onte quò ven, quela tradicion ? » lo monde saben pas vertadierament. De la periòda revolutionaria, los famos « aubres de la libertat » ? E onte quò se fai ? Nonmas dins lo domeni occitan ? Alhors tanben ?

Aparentament, quò es beucòp pus vielhs que quò, quò monta a Lois Padela, la periòda celtica, e benleu avant. Onte quò se fai ? En pais d'òc, en pais d'òil e un pauc pertot dins lo monde. Per ne'n saber mai, vos recomande de legir lo libre de Marie-France Houdart « Arbres de Mai, Mai de l'élu(e), paregut a las edicions Maiade, un libre plan complet. L'autriça i fai un estudis plan documentat, partant de la Corresa onte demòra. I a totplen de textes en occitan : vielhs textes, chançons, extrachs de Marcela Delpastre, de Jan dau Melhau que « a retrouvé les trois notions cachées : mai pour le mai, mai pour la croissance et mair évoquant la mère » e de segur tot aquò nos mena a la divessa antica « Maia ».

Per chabar, quò es verai que sovent, lo mai chas nos es un pinhier mas pas forçadament. Quò pòt esser un jarriç. Daus uns còp es tornat plantar emb sas raiç. N'i a que bòtan una roquilha de vin jos las raiç. Chascun son biais de far, vos en privetz pas !

Denis Gilabert.

NB : Las paraulas de « Plantèm lo mai » se pòden trobar sur lo blògue, emb l'aimabla autorisacion de l'autor Patric Salinhier.

Photo: Lo mai daus elegits a Sent-Victor en 2014

Plantèm lo mai - Peiraguda ( Patric Salinhier),en occitan lengadocian sarladés.

Plantèm lo mai
Plantèm lo pinhièr
Davant l’ostal
Plantèm lo mai
Plantèm lo pinhièr
De mai en mai.

Per la fin d’abrial
Lo plantarem
Lo jorn del trabalh
Mès n’aurem cap de fial :
Es mai de paure
Que lo de Nadal.

Per ’Lèna, per Chavà,
Que se van dissabde maridar.
Per ’Lèna, per Chavà,
Que se van dissabte potonar.

Per Francesa e Miquèl
Que se son bastits un niu novèl
Jos un bocin de cèl
Pincat al cimèl d’un rocanèl.

Après las eleccions
Quand a ganhat lo qu’aviam causit
E que serà portur
Deus espèrs que nos tustan lo cur.

Mes pas per los patrons
Del mens los que nos espanisson
Que fan plegar lo còl
Aqueus Monsurs que nos fan virar fòls.

Anuèch deçai levat
Serà l’albre de la libertat
Pincat cap al capial
A nos chabròls, grilhons e cacals.

Fotò: Patric Salinhier