Le célèbre groupe périgourdin Peiraguda fêtera vendredi 13 et samedi 14 octobre ses 40 ans de carrière au centre culturel de Sarlat. Ne cherchez plus de place, tout est déjà complet ! L'occasion de revenir avec Joan Bonafont sur les projets du groupe.
SO : Endonc, Joan, Peiraguda, quo es tornat partir ?
E ben òc. Dempuei qualquas annadas eran subretot pres per « L'Affaire Brassens », l'espectacle que vira enquera. Aviam enveja de nos tornar botar dins Peiraguda. Avem pres ben de plaser a tornar trobar las cançons, de far daus adobaments. Avem aura un espectacle d'una bona vintena de cançons que crueba totas las periòdas de Peiraguda.
SO : Queste còp, avetz causit Sarlat per festejar los 40 ans. Perqué ?
Perqué sem de Sarlat e nos an totjorn ben reçaubuts ! Per los 30 ans aviam fait un concert a Montinhac, onte aviam començat sur scena. Mas avant per los 10 e 20 ans, quò era tanben Sarlat.
SO : Me sei laissat dire que vai i aver de las surpresas aus dos concerts de Sarlat ...
Aurem coma convidat dos amics Jan de Nadau que coneissem dempuei 40 ans mai Francis Cabrel, que coneissem dempuei 30 ans. Quand l'i ai damandat si volia cantar qualquas cançons emb nosautres, me diguet simplament de òc, ço que nos faguet plan plaser. L'i cresiam pas ! Aurem tanben Los Pagalhos, los contaires Daniel Chavaròcha e Daniel Lhomond e totplen d'autras suspresas.Nòstres convidats van demorar los dos sers. Avem fait una repeta ensemble a Astafòrt chas Francis: quo virava coma un relòtge !
SO : E quala es la formacion actuala de Peiraguda ?
E ben, lo « canal istòric », Patric Salinhier e io, mai Jacques Gandon ( guitarra, cant), Pascal Bonafont, mon filh ( bassa), Patrick Descamps (accordeon, piano...) e Laurent Chopin (percussions). Nos coneissem ben, trabalham ensemble dempuei un brave moment.
SO : e apres l'espectacle ? Daus projects ? Una virada ?
Farem un DVD d'aquels spectacles, que deuriam surtir per la fin de novembre*. Parlant de virada, as pas tòrt, partirèm a Oxford, England ( e òc) per far dos concert los 21 e 22 de novembre sur convidacion de nòstre amic anglés de Perigòrd Denis Noble dels Oxford Trobadors. Apres, farem daus concerts en Perigòrd, tot en far virar « L'Affaire Brassens ». Serem plan afarats l'an que ven !
(* 17€, bon se soscription a trobar sur nòstre blògue http://occitan.blogspirit.com/archive/2017/10/08/le-dvd-du-spectacle-de-peiraguda-des-13-et-14-octobre-1060534.html). Denis Gilabert.