'Quela istòria se 'via passat, i a longtemps... bien longtemps...Qu'era un ser de velhada.. La Jana e lo Jan avian 'nat chas daus vesins un pauc eslonhats. Apres aver platussat, minjat quauques grilhons e chastanhas, begut dau citre, se 'vian plantat davant la chamineia per prener un pauc de chalor avant de se'n tornar a pè dins la nuech.
Jana e Jan se'n tornavan sens ren dire, dins lo chamin blanc de nevia. Se 'vian maridats dempuei mai de dietz ans. Avian pas 'gut de pitit. Qu'era pas fauta d'aver consultat tots los metges-surciers dau país, prejat tots los Sents de la contrada, 'nat beure l'aiga de las fonts e tucat los barruelhs de las pòrtas d'egleisas... totjorn ren !... zò rencureren mas ne'n parleren pus.
'Queu ser, a la caforcha daus chamins, un pitit goiat de nevia se teniá 'qui plantat,  façonat dins la jornada per daus goiats dau vilatge. Lusissiá jos lo rai de la luna... semblava los convidar a s'aprupchar... Jana se quintet, passet la man sus sa jauta, sus son espanla, sus son braç... semblava far un rison e se botet de bujar. Qu'era pas de creure ! Eu los seguet.
Un còp 'ribats a la maison, placeren lur tresaur dins la chambra la mai freja per qu 'eu siá uros...Tot lo monde venian lo veire. Qu'era 'na miraudia. L'ivern passet, venguet la prima... De mai lo solelh era lusent, de mai lo pitit era triste.
 'Ribet la St-Jan. Sos amics vengueren lo querre per far 'na ronda autorn dau fuòc.
Per far coma los autres, eu s'eslancèt e sautet sus la flama mas a 'queu moment, i aquèt coma 'na gerba de lunons...   « demorarai per totjorn dins vòstres còrs » disset-eu avant de  s'eszublir dins una reclana. Demoret juste quauqua gota d'aiga dins la man de sos amics.
Lo jorn lo pus cort l'aviá menat e lo jorn lo pus long l'aviá emportat.

°°

Per 'quela 200a rubrica en òc, , tòrne drubir, emb beucòp d'emocions e de nostalgia, lo grand classor dau « Bòsc dau Leberon » preparat coma lo Piare Rapeau, qu'avia pinturat , dins las annadas 90, una quarantena de personatges de nòstres contes lemosins sus las vielhas cabòrnas de chastenhs de 'queu bòsc rasis Ajac, per « un propchen libre » que voliam far editar... mas sabetz coma lo temps se'n vai... Lo Piare partiguet en 2007. N'aviá pus ausat lo drubir.
Alaidonc, per 'quela 200a paja,  ai envia de partatjar 'queu conte lemosin de Nadau qu'aviá l'abituda de dire per las visitas dau Bòsc... conte trobat chas Georges Emmanuel Clancier dins « la vie quotidienne en Limousin qu XIXe s. » Ed. Hachette.

Jaumeta Beauzetie

Ashley e sos frairs Brendon e Bryan, tres pitits peirigòrdins* bien de chas nos (son daus pitits noms que ne’m veu corament dins nautres escòlas, aura, damandetz…) an estat « gastats » per ’queu Nadau 2017, lurs parents maitot, vesetz :

- Una Play Station (la PS 4 emb la maneta Dual Shock e lo volant Racing Wheel) e demai : dos DVD de juècs : « Starwars Fighters » e « Copa dau monde de Quidditch de Harry Potter » per los dos goiats. Bryan auriá mielhs aimat la Game Cube (que fau dire « Guesm Kiob ») de chas Nintendo... ;
- Una Game Boy color DS (Dual Screen) e una Barbie Fashion per Ashley ;
- Una clau USB MP3 (Universal Serial Bus ; Media Player 3) per Brendon emb la Star Academy 6 desja enrejistrada dessus (Si es-plan : z’an fai !), et un Action Man « Army » per Bryan ;
- Un portable Samsung que fai foto, WAP (Wireless Application Protocol) e que a la sonaria HiFi (Hi Fidelity) per Brendon que ven nonmas de ‘ver dietz ans.
- E per tots tres, una Web Cam per lo PC** de la familha (desjà conectat a la ’rantela -Internet- via lo servaire « Wanadoo*** » de (France ?) Télécom) ;
- Un « systema Home Cinema Hi Fi » per lors parents emb lo lector DVD/DivX (Digital Video Disc Digital Video eXpress) emb lo « Bass Boost » ; un GPS (Global Positionning System) per lo 4x4 de la familha, desja equipat de l’ABS (Antilock Brake System) e l’ESP (Electronic Stability Program) ;
- Per ela tota sola, Ashley a ‘gut la TV (que fau dire « tivi ») dins sa chambra (en fin : a ueit ans, l’èra la sola de sa classa que ‘viá pas la télé dins sa chambra !): una pita « Soundwave » que a tot parier un tube LCD (Liquid Crystal Display) !

- E lo lendeman, tota la familha a festat quò-quí en anar au Drive In dau Mac Do apres ‘ver fach le plen de comissions au Lidl****…

Nautres ‘vam pas tardar a tots estre americans, ‘qu‘es segur !…

* : Podetz remplaçar « Peirigòrdins » per la contrada de França que vos plai : quò marcha totparier…
** : « PC » aquí vòl pas dire « Papier per lo Cuòu », mas « Personal Computer »... e tanben « CD » vòl dire « Compact Disc » e non pas « Disque Compact ». Vos parlarai pas de « NTSC », « WMA », « ID3 Tag », and so one !
*** : Qu’es que, vesetz, « France Télécom » an degut donar un nom estasunian a lur servaire de ‘rantela : ‘quò fai mai serios per la clientela !!!
( « Wanadoo » es ‘na contraccion de « I want to do » en american : « Vòle far » o « Vòle vos las bofar» )
**** : « Lidl » es pas un mòt inglès, « Anglo-saxon »… es solament saxon !

Patric RATINÒC.

Joan-Pau Verdier e Nicolas Peuch nos informan que lo convidat de l'emission dau diumenc 10 de decembre 2017 sur França Blu Perigòrd sera Jan-Peire Reidi per son noveu libre "Lo nas e lo manteu", reviradas dau russe en occitan de doas novelas de Sent-Petersborg per Nicolas Gògol.

Meitat chen , Meitat pòrc , chasque diumenc a 11 oras  sur França Blu Perigòrd!

Per escotar l'emission en directe o en redifusion, clicar sur lo ligam:  França Blu Perigòrd

Veiqui lo ligam vers lo site de Joan-Pau Verdier

e los ligams vers lo sites de Nicolas Puech:  www.nicolaspeuch.com e anemtrio.com e facebook.com/nicolaspeuch