L'avetz legit dins Sud-Ouest dau 12 d'abriu ? Un novel arrestat de la prefectura de Dordonha, datat dau 5 d'abriu defend de far bruslar dau « restrum verd » ( fuelhas, brochilhas, bròchas eac...) defòra, dins vòstre vergier o vòstres bòscs. Pas coma avant, pendant la prima o l'estiu, mas per totjorn. Dau monde mai fins que n'autres nos explican que tot queu brusladis es causa de la polucion, las famosas particulas finas que nos tuan a pitit fuec.

Que, vesetz, avem enquera ren comprès, sem bestias de pas creire... Jusc'a ier, me cresia vertuos : pòrte totas mas saloparias e mon plastic a la restrumaria( la déchetterie), fau venir daus cacaus biò, fau un vergier legumier, sei per las energias renovelablas, essaie de pas gaspilhar l'aiga. M'avian dich a l'escòla que la mestresa dau fuec era l'una de las mai importantas conquestas de l'òme...E ben, Cròs Manhon e los que l'an seguit eran daus colhons, d'alhors, son tots mòrts !

Io que sei benleu enquera mai colhon, me pause de las questions, tot parier. Si doman, vòle far dau bois per ma chamineia ( sabe que daus uns vòlen zo defendre tanben), me faudra portar lo restrum a la restrumaria . Laidonc vau prener mon tractor per l'i menar ( anar tornar, quò fai 16 km e quantben de litres de carburant?). Un còp sur plaça, que se passara ? Van far virar daus utils per zo esbocinar o far cramar. Mas, tot quò-qui, quò marcharia pas au diesel o a l'electricitat de las centralas nuclearas? M'avian pas dich que quò es pas bien ? Me sembla que la « piada ecologica »de l'afar es pas tròp bona mas lor fau fisança, an degut zo mesurar.

An tot previst: en campanha, si setz tròp luenh de la restrumaria, auretz benleu drech a una derogacion : entre lo 1er d'octòbre e la fin de feurier, podretz far dau fuec, mas entre 10 e 16 oras e nonmàs si avetz depausat una damanda a vòstre meraria 3 jorns avant. E si que non, o si lo fuec es pas tuat a 16 oras 1 minuta, qué se passara ? E ben, vos envoiaran los gendarmes e deuretz vos acquitar de la soma de 450€.

Quò es vrai que an nonmàs quò de far, los gendarmes. Nòstres « decidaires » trabalhan nonmàs sur de las chausas essencialas, per melhorar nòstras pitas vidas,per trobar de las solucions aus problemas vertadiers que n'autres, paubras panolhas, sabiam quitament pas qu'existavan. Vos dise que son mai fins que n'autres, quilhs monsurs, quilhs «òlis ». Òlis? Vene nonmàs de comprener perque an paur de nòstres fuecs ! An tòrt, que, si sem bestias, sem pas tròp meschants. Pas pro, benleu ?

Denis Gilabert.

Sur lo mesme tema, de legir la cronica de Jan-Peire Reidi, plan premonitòria. 

http://occitan.blogspirit.com/archive/2017/03/17/particulas-finas-partida-1-de-jan-peire-reidi-1056509.html

http://occitan.blogspirit.com/archive/2017/03/22/particulas-finas-seguida-e-fin-de-jan-peire-reidi-1056628.html

L’occitan aiga [ʼajgɒ] "eau ; cours d’eau, ruisseau, rivière " (du latin aqua) est très fréquent en toponymie. Les formes anciennes de Chadelaygue à Saint-Jean-d’Eyraud, nous éclairent sur la signification de ce lieu-dit traduit par Chef-de-Laygue : Chapt, Chap-de-l'Aygue, en 1709, avec la précision « à la source de l’Eyraud ». C’est la même étymologie que Capdrot, occitan cap dròt  : " tête, source du Dropt".

Jean-Claude Dugros.

Dimarç 18 abriu de 11 a 12 oras e dissabte 22 abriu de 20 a 21 oras sur RLP 102.3, Cristian Lafaye presentara Joan-Peire Pommier, creator de las biscotas e los gaufres "La Chantéracoise" que parlara tanben de las jornadas europencas daus molins que se debanara los 20 e 21 de mai 2017.