Dimecres 24 de junh 2023, Henri Stassinet, director de França Blu Perigòrd convidet la premsa e la familha e los amics de Joan-Pau Verdier a la pausa de la placa que dona lo nom de Joan-Pau Verdier a l'estudiò onte enregistrava sas emissions de 1995 a 2019, en companhia de Marçau PeironI mai Nicolas Peuch emb l'ajuda tecnica de Franck Lutton. M. Stassinet insistet sur la trabalh remirable que faguet Joan-Pau per la stacion e l'occitan.

L'eveniment se debanet en presencia de Katy e Louis Verdier, eposa e filh de Joan-Pau. La placa fuguet dessenhada per José Corrèia.

Marçau Peironi, professor d'occitan au collegi e au liceu Bertran de Born a Perigüers donet totplen d'anectòdas sur sa collaboracion coma Joan-Pau. La chausida dau nom de l'emission "Meitat-chen, meitat-pòrc": voliam una emission duberta a tots e pas nonmàs aus occitanistas, alaidonc fagueren la chausida d'un biais de dire popular e plan conegut dau monde perigòrd, onte lo monde son meitat-chen, meitat-pòrc e en Lemosin son meitat-chen, meitat-coquin".

"Los ròtles eran separats entre nosautres dos. Joan-Pau era lo serios, lo clown blanc e io, lo clown auguste; me sovene de crisas de rire...Joan-Pau era conscient de la valor de son òbra unica, en francés, en occitan, mas demoret umile. Era important, mas zo fasia pas sentir aus autres. Katy Verdier m'ofret recentament un CD "Tabou le chat" per mon filh que lo fai virar en bocla!. Joan-Pau era jamai tant content que quand parlava coma dau monde dau pòble, daus paisans. Obludet jamai sas originas popularias de las ruas nuòvas a Perigüers".

" Quand Marçau me perpauset per prener sa seguida, çò -disset Nicolas Peuch, li respondi "Ses segur?" . Io, era un pauc impressionat. E ben, Joan-Pau sabia botar lo monde a l'aise. Dins las intervistas, sabia botar los convidats en valor. M'a format a prener la seguida de Marçau, era totjorn de bon conselh".

De mon costat vos perpause de veire l'album quauquas fotòs que prengui a l'epòca dins l'estudio de "Meitat-chen, meitat- pòrc", en clicar qui-dejos:

http://occitan.blogspirit.com/album/joan-pau-verdier-a-franca-blu-perigord/

De legir tanben, l'article que escrigui per los 20 ans de "MCMP"

http://occitan.blogspirit.com/archive/2015/09/14/vingt-bougies-pour-meitat-chen-meitat-porc.html