Un autre raibe negre ...

Doas oras demiá de rota. Paiatge. Pont. Vent sus lo pont. Isla de Ré. Presque ‘ribats. La flòta. Lo pòrt. Parcament. Credem lo proprietari. Nos trobem davant lo jaiç(1). Lo temps de davalar nòstres sacs e es ‘ribat. Drueba. Nos monstra nòstra chambra. Paie. Nos saludem. Se’n vai. Drubem los sacs. Ne’n tirem çò que fai per ‘nar marchar. Quatre oras. Quo es partit.
Seguem lo chamin còstier pendent cinc quilometres. Ceu blu. Vent frech. Un vertadier pela-paus.
Retorn. Au fons dau vargier, i a lo jacuzzi. z’am bien meritat. Docha. Malhòts de banh, rauba de banh. Sieis oras. Davalem l’eschalier. Debas, la sala emb tres taulas e çò que fau per chaufar son minjar. Dos vielhs son sietats e minjan. Me ‘reste. Quo es mos beu-parents. Sabiá pas que devián venir aquí. Nos potonem(2) e direccion lo jacuzzi. Curios azard. Si eran vengut cinc minutas aprep, nos seriám pas vists.
Jacuzzi. Restaurant. Tele. Nos crosem enquera au desjunar. Tornem marchar diumenc matin. Trainem. Quatre oras. Veitura charjada. Temps de se’n tornar. Plen au subremerchat. En rota.
Dos o tres quilometres que som surtits dau subremerchat. Veitura blancha davant. Fuòc de destressa. Per la vitra, nos fai signe de nos restar.
Se parca sus la drecha. Fam parier. Vese un peja-tot-sol (3) sus la vitra ariera : Chabatz d’entrar. Veitura imatriculada en Dordonha. Lo menaire(4) davala. Fau parier.
Quo es lo Patric. Mon vesin !
Si aviá saubut, seriai vengut coma ma femna...
Gilbert Borgés.

Vocabulari : (1) gîte (2) nous nous embrassons (3) autocollant (4) chauffeur