Mariska Rebière, 26 ans, nascuda a Sent-Pardol La Ribiera es una de las doas regentas de la Calandreta Pergosina de Perigüers. Rencontra coma  una jòuna femna passionada de lengas, licença d'anglés mai amorosa de sa lenga familiala l'occitan.

DG : Mariska, qual  es vòstre parcors d'estudis?
Ai passat mon Bac a Sent Josef a Perigüers, apres, sei partida aus Etats-Units per passar mon bac anglés dins lo Minnesota, ai fait una licença d'anglés a Bordeu qu'ai validada a l'universitat d'Oklahoma. Parle un pauc l'espanhòu, tanben. Ai fait un "Master" Mestiers d'Ensanhament a l'universitat de Perigüers a la Granadiera. Apres un an de reflexion en tant que survelhanta au liceu Jay de Beaufort, ai decidat de me lançar coma regenta de calandreta .

DG : E per l'occitan ?
D'en prumier, quo es una lenga qu'ai totjorn auvida parlar a la maison, en particulier chas mos grands parents, mai mos parents. Ma mair, passionada de dança m'a fait aprener las danças tradicionalas. Per aprener a escriure e ensenhar, ai seguit e segue totjorn lors cors de Joan Ganhaire, Marisa Lasjuilliarias e Micheu Chapduelh qu'ai apres a coneitre a l'Escòla Occitana d'Estiu a Vilanòva d'Olt. Dau monde que m'an apres totplen de chausas.

DG : Coma se passen las jornadas a la Calandreta ?
Plan ben, sem doas regentas, coma Olivia Mullier, la directriça. Sei en charja de la mairala, 19 goiassons de tres a cinc ans. Quo es una "pedagogia institutionala d'inspiracion Freinet". Començam la jornada emb "Que de nuòu ?", avem "Lo conselh", mai "La monuda". Los eslevas son en imersion occitana. De segur parlam francés tanben e fasem de l'iniciacion a l'anglés. Vesetz, tot çò qu'ai apres me serv dins mon noveu mestier.

DG : Coma es l'ambiança ?
L'ambiança de l'escòla es plan bona, familiala. Los parents son plan implicats e balhan la man. Sem asociats a las decisions, nos sentem bien sostenguts. Quo es l'ambiança que cerchava, justament. En mai de quò, quò me permet de parlar e far viure l'occitan e de botar en pratica tot çò qu'ai apres. Rencontram dau monde plan interessats e motivats per la lenga.

Un bon començament de carriera, pròba de mai que l'estudis de l'occitan pòt aidar trobar un trabalh dins son ranvers pròpche e dins son mestier.

Denis Gilabert.