Quante rencontri Antonin Duval e Gilles de Becdelièvre, lor demandi d'onte venia lo nom dau grope, me disseren : « Gargamas es un autre nom de Gargantua », lo famos gigant Gerjan daus contes vielhs. « L'ideia nos venguet d'un conte de Daniel Lhomond onte lo gigant Gargamas pissava dins la Dordonha...Trobèrem que qu'era un brave nom per un grope de musica tradicionala ». Antonin lo violonaire, 23 ans ven de Normandia e Gilles 32 ans, acordeon diatonic e chant, nasquet en Perigòrd. 

« Fau dau « trad » dempuei mai de dietz ans, ço-ditz lo Gilles, qu'es a dire de la musica que fuguet colectada en Perigòrd-est o Lemosin pròpche de Dordonha per Casse e Chaminada en 1905 ( chansons patoises du Périgord) o mai recentament per Thierry Boisvert dins las annadas 1980. Jugam de las chansons coma « Las filhas de Marzac », mais de las mens conegudas de segur ».

Eran convidats dijuòus passat a la mediateca de Trelhissac per jugar vivent a l'enregistrament de « D'òc show » de octele.com. Los dos òmes baten la cadança sietats en tustar daus pès dautemps que jugan e chantan. Fuguren bien clafats per lo public. E viratz beucòp ?

« Oc-plan, en Dordonha, mas tanben en Lemosin, Auvernha . I a pertot un reviscòu vertadier per totas las danças patrimonialas e de mai en mai vesem daus jòunes que venen per aprener las danças coma la borreia o b'etot la sautiera ». Quò es vrai que que lo nombre de jugaires d'instruments traditionau fai nonmas de creisser, un pauc pertot en França, pas nonmas dins lo domeni occitan. « Fasem sovent de la presentacion en escòla, collegis ou liceus, coma per exemple a Bertrand de Born au cors d'occitan de Marçau Peironi. E podetz nos creire, son interessats, los joùnes, son un pauc surprès a la debuta de veire dau monde que an nonmas quauquas annadas de mai que ilhs ». E avetz de las autres activitats ? "Oc-ben, mas totjorn dins lo « trad », avem un autre grope « la Poule Noire » emb Cecile au chant. Dins queu moment sem trapats de chabar un CD per Gargamas que deuria surtir en junh que ven ».

Eh bien, voilà un duo actif au service d'une musique qui effectue son grand retour avec la langue qui la porte.

Denis Gilabert.

De veire tanben: http://gargamas.wix.com/duogargamas.

e de segur sur : octele.com partir de dimarç 8 de abriu.