"Aqui es lo còr de la spiritualitat" disset Jérémy Couraut dau grope Djé Baleti, en concert a Rabairac dissabde 23 de novembre, convidat per Mélanie Célérier dau Forum Culturel.
Rencontre d'avant concert coma un musician plan originau , seren, au moment que lo grope vai commençar a virar emb las novelas chançons de lor CD a venir, "Moko" previst en mai 2020. Le concert que seguet a confirmat la virtuositat e l'energia dau grope e dau famos musician emb son espina de Niça, instrument que reviscolet e que ne'n tiret un noveu son en l'electrificar.
DG : Jérémy Couraut, podetz nos presentar lo grope ?
Lo grope se sona Djé Baleti, avem Antoine Perdriolle a la bateria, Menad Moussaoui a la bassa, Pierre Montel au son e io, a l'espina de Niça e au chant. Venem de Tolosa, onte demòre aura, mas sei nissart. La formacion actuala a tres annadas d'existencia. Ai començat i a dietz ans.
DG : Eratz desjà venguts en Perigòrd?
Òc, un còp per los jòves au liceu Bertran de Bòrn a Perigüers, convidats per Marçau Peironi, un plan bon sovenir. A Rabairac, aquò es lo prumier còp.
DG : Qu'anatz-vos jugar de-ser ?
Anam jugar las cançons de nòstre album a venir, « Moko ». Venem de l'enregistrar, aura es a mesclar, la surtida es previsda per mai 2020. Aquò es un pauc una avant-prumiera, la virada vertadiera vai començar en febrier.
DG : Quau sera lo tema de queu albòm?
La tematica es la mitòlogia de Carnavale e la Mediterraneia doas chausas importantas per io. Sovent, lo monde van cercar la spiritualitat alhors, chas los chamans d'Asia, d'Africa. Cò que m'interessa es lo paganisme d'aqui, ne'n vòle repilhar( tornar trobar) la spiritualitat. Avem aqui tanben de traças de las religions paganas, mas fau cercar. Avem la religion del Cornut que tornam trobar dins lo carnavale, a Niça. Ai trabalhat coma mon amic l'escrivan Dominique Pauvert. Son libre remirable, « La religion Carnavalesque», era una inspiracion per lo CD e avem un project de conferenças ensemble. En Perigòrd, en Lemosin avetz Combi, Chapduelh, Melhau : son dels chamans. Crese que aqui es lo còr de la spiritualitat, chas vosautres.
DG : Que pensatz de la borrèia?
La borrèia, quatre temps e una seconda...An fait d'estudis dessur, pareis que quò fai cambiar d'estat d'esperit. Quò vos pòt botar en transa. Escotatz chantar Combi : quò es una musica pagana!
Denis Gilabert.
L'accordéoniste Nicolas Peuch viendra présenter son nouvel album "Rencontras de bal" à la librairie Marbot, 17 cours Montaigne à Périgueux lors d'un mini-concert acoustique près du rayon CD et DVD samedi 14 décembre en matinée à partir de 10 h 30 .
Joan-Pau Verdier e Nicolau Puech nos informan que lo convidat de l'emission dau diumenc 8 de decembre 2019 a 11 oras sur França Blu Perigòrd sera Joan-Claudi Dugros, majorau dau Felibritge, en charja de la revista "Paraulas de Novelum", animator de talhiers de lenga, traductor, que vendra parlar de son actualitat, de son trabalh coma Bernard Lesfargas, dau libre « Chant de la vielle » e de sos projects de libre emb las edicions « Perce-Oreille ».