Adiu, brave monde!

avetz de segur remarcat que la fòrma actuala dau blògue Rubrica en òc a chanjat. Quò es una fòrma temporaria, lo temps que fasem de las òbras .

D'efiech, lo jornau Sud-Ouest botet un punt finau a lor platafòrma de blògues lo 15 de decembre ( tots los blògues, pas nonmàs Rubrica en òc), laidonc avem degut tornar prener nòstra "independancia" per poder contunhar de vos informar sur l'actualitat occitana de Perigòrd mai d'alhors.

Farem de las modificacions dins las doas setmanas venentas, siaguetz pas tròp estonats.

Bona dimenjada,

Denis Gialbert, animator de Rubrica en òc.

L'animator Nicolas Peuch nos infòrma que lo convidat de l’emission dau diumenc 18 de decembre a 11 oras sur França Blu Perigòrd sera lo cosinier Joan-Francés Bittard.

Meitat chen , Meitat pòrc , chasque diumenc a 11 oras  sur França Blu Perigòrd!

Per escotar l'emission en directe o en redifusion, clicar sur lo ligam: França Blu Perigòrd

Veiqui lo ligam vers los sites de Nicolas Peuch:  https://www.nicolaspeuch.com/ e https://fr-fr.facebook.com/nicolas.peuch

Un messatge de Joan-Ive Agard de l'associacion "Musica au molin"

Adiushatz,

Trobaras en peças juntas lo programma dau concert de dissabde que ven dins l'egleisa de Sent Marçau de Valeta a 16:00 (egleisa chaufada).

Anem presentar la creacion contemporeana 
MESSA OCCITANA 
de Bruno ROSSIGNOL (en creacion)
chantada per lo Còr PaRatge (25 coristas - 4 votz)

Presentarem tanben de poèmas en bilingües (occitan e francés) e una òbra qu'evòca la resistencia en Perigòrd ("Mas zo farai...") e de la òbras dau repertòri classic (Bach, Mendelssohn).
 L'objectiu d'un tau concèrt es de ciblar de noveus publics :
- D'un biais, far descubrir aus melomans classics que la lenga occitana benlèu una font d'inspiracion e de creacion per lo compositors de musica dicha sabenta e contemporanèa.
- E d'autre biais, far descubrir aus occitanistas que la musica occitana se restrenh pas a la musica daus trobadors, folclorica, fòlc, au ròck o electronica.
En brèu, far encontrar de publics que se costejan pas abitualament en presentant una creacion en lenga occitana lemosina.

Lo concèrt es organisat per l'Union occitana Camila Chabaneu e sostengut per lo P.N.R. Perigòrd Lemosin. Los mercejam vivament.

Vos serai reconeissent de difusar aquela informacion e paperons au près de vòstra ret de melomans classics e seriam uros de vòstra preséncia.
Avètz la possibilitat de reservar e d'estampar vòstre bilhet  (6 eur) sus :

www.billetweb.fr/messa-occitana-saint-martial

Plan coralament 

2022 12 17 MESSA OC PROGRA SENT MARCAU.pdf