Divendres 7 d'octòbre era una jornada importanta per los collegians e liceans que seguen l'opcion occitan en Aquitania. A Perigüers se tenguet la prumiera jornada de liason collegi/liceu per lo nòrd de l'Academia de Bordeu, a l'iniciativa dau Conselh Regionau e dau Conselh departamentau de Dordonha. Los talhiers se debanèren au Centre de la communicacion e au liceu Bertran de Bòrn.
Venguts de Dordonha ( Perigüers, Rabairac, Brantòsme e La Coquilha) e de Gironda( La Reula, Langon, Lo Boscat, Bordeu) mai de 250 eslevas an seguit un programa que la tòca era de se rencontrar per lo prumier còp e mai que mai auvir daus artistes o professionaus de la communicacion parlar de lor mestier. En dubertura, Joan-Maria Sarpolet, inspector pedagocic regionau, insistet sur la responsabilitat qu'avem de transmetre e far viure la lenga occitana, la daus trobadors.
Lo film de Georgette Power, « Deflagation »,inspirat dau colectatge de la memòria occitana fuguet projectat ; l'autor insistet sur la necessitat de pas oblidar sa pròpa cultura, quitament si banham dins una cultura mondiala dominanta. En segre, Dolàn Xakò, juguet sur scena son noveu CD « Parallelas », musica electronica e hip-hop, realisat emb daus bocins de musica tradicionala. Las questions e eschanjes coma los eslevas fuguèren plan riches. Marçau Peironi insistet sur tot lo potenciau occitan a descubrir e trabalhar per daus artistes, laidonc que Sebastien Girard tornet dire que daus projects se pòden finançar, sia per lo dispositiu Scenes d'Aqui o sia per credada a project per l'Agença Culturala Dordonha Perigòrd.
Stéphane Valentin presentet aus eslevas los programas e projects de octele.com, la tele 100 % occitana sur internet e insistet sur los mestiers, tecnics e artistics que quela tele pòt ofrir doman a daus estudiants que chausissen l'occitan. Stéphane informet que lo prupchen D'òc Show deuria se virar a Nontron en decembre.
Laurenç Labadia, artiste, comedian, meteire en scena e patron de Pixel'òc, parlet daus mestiers de comedians per virar de las ficcions, per far daus doblatges de films e dessenhs animats, dins los diferents dialectes occitans. Laurent botet quauques eslevas en situacion de doblatge e aguet un franc succès.
La jornada se chabet sur una iniciacion a las danças traditionalas, dins la chapela dau liceu.
Los eslevas se'n tornèren apres aver descubert una partida de las possibilitats de mestiers que pòt ofrir l'occitan. Denis Gilabert
De legir sur Dolàn Xakò: http://occitan.blogspirit.com/archive/2016/06/08/dolan-xako-electronique-en-oc-1049636.html
De legir sur Pixel'òc: http://occitan.blogspirit.com/archive/2015/09/20/une-formation-a-l-occitan-pour-les-comediens-1041435.html
e enquera: http://pixeloc.com/
Joan-Pau Verdier e Marçau Peironi nos informan que los convidats de l'emission dau diumenc 23 d'octòbre 2016 a 11 oras sur França Blu Perigòrd seran François Lagorce, Christian Lavaud e Line Simon per parlar de lor novela estructura «occitania creativa».