Rencontra coma lo Director Eric Sudrat
« Dempuei, lo 12 d'octòbre 2024, ente 'la fuguet enregistrada oficialament, la Calandreta de Perigüers a 25 ans d'existença e acuelha questa annada 67 pitits calandrons dins 4 classas » explica Eric Sudrat, lo Director que 'ribet a Perigüers en 2006. En mai de sa fonccion de Director eu fai la classa aus pus beus e es Director tanben de la Calandreta de Lemòtges (doas classas).
« Ai començat lo chamin de las Calandretas en 2000 a Lemòtges pendent dos ans puei anei a Tolosa, quatre ans venguei a Perigëurs e i demorei 7 ans coma Director vance de tornar a Tolosa en 2013 per drubir lo « collegi Calandreta » de la 6a a la 3a, que compta uei 80 escolans.
Ensenhar en occitan : una evidença !
« L'occitan, per me, qu'es n'evidença. Me sei mesme pas pausat la question ! ditz-eu tranquiladament. Nascut a Sent-Irieis (87), sos grands parents eran de la Ròcha (La Roche l'abeille) e totas las generacions d'avant parlavan quela lenga... « l'occitan era la lenga dau vilatge, daus vesins... l'ai totjorn auvida... Aura, qu'es ralle que i àia daus parents occitanofònes mas çò que los interessa qu'es lo bilinguisme e de dire aus pitits qu'apartenen a una istòria, la dau país ente viven. « Tu apartenes a un país e tu fas evòluar l'istòria dau país ! ». Segur que de balhar de las racinas aus pitits los rend mai fòrts dins la vita.
« Lo bilinguisme permet tanben de mielhs comprener las reglas de gramatica, coma i a pas una lenga mai importanta que l'autra, n'um pòt far de las comparasons, qu'es pus aisat d'aprener.
Pedagogia institucionala Freinet-Oury
« Io trabalhe beucòp emb la pedagogia institucionala e coma las tecnicas Freinet que pòt permetre a l'enfant d'èsser autonòme dins sos aprentissatges, lo rendre actor. La pedagògia institucionala de Fernand Oury permet maitot d'aculir la paraula de l'enfant per lo mielhs comprener e entau adaptar los gestes d'ensenhaments a sa personalitat.
La pedagogia Calandreta es una pedagogia que marcha plan bien. Quand surten de la Calandreta e que van dins daus collegis aus alentorns, an las felicitacions dau Conselh de Classa, prenen de las responsabilitats, sovent son delegats. En classa participan beucòp, pausan de las questions e saben ajudar los autres . Trabalhan en cooperacion pustòst que d'èsser en competicion ! »
Nombrosas surtidas
En mai, surten suvent de las classas. Darnierament avem fach una surtida « chastinhas », en grope. Apres en classa, organizam daus 'taliers botanics, cosina, teatre, contes... Engijan de las escenas per contar de las istòrias... qu'es plasent !
L'ensenhament tot en occitan se desvelopa bien e podem d'enquera aculhir dau monde ! »
Rapelam que las Calandretas (petites alouettes) fugueren montadas en 1979 a Pau coma 'quò fasiá fauta dins l'ensenhament public ? Escòla laïca, associativa e ensenhament imersiu en occitan.

Jaumeta Beauzetie, de l'Union Occitana Camila Chabaneu de Nontronh

De veire qui-dejos, lo site de la Calandreta Pergosina:

https://calandretapergosina.org/