Quò pòt semblar estranh, mas lo chasteu de Bordelha vai festar dissabde 8 de setembre que ven l'anniversari daus 800 ans de la mòrt de Simon de Montfort, meschantament conegut per aver menat la crosada contre los albigés. Joan Ganhaire qu'aguet quela ideia nos en parla.

DG : Coma vos venguet quela ideia?
Quò me tafurava de veire lo portrach de Simon IV de Montfort dins lo chasteu de Bordelha, quante sabem tot lo mau que faguet en botar tot lo domeni occitan a fuòc e a sang dins sa crosada contre los catars, mai que mai per botar la man sur lo domeni daus contes de Tolosa. Quò fuguet tanben la creacion de l'inquisicion e la debuta de muertres de massa...Un òme plan maujauvent que se faguet tuar per de las femnas emb un tira-peira au sieti de Tolosa. L'idèia es de far saubre tot çò que faguet e de ne'n parlar. Lo conservator dau chasteu e la Semitour dissèren de òc e l'associacion Pampaligòssa de Bordelha prenguet le project en mans.

DG : Quau ligam a entre lo Perigòrd e Simon de Montfort ?
Venguet atacar Bernat de Cazenac dins son chasteu de Castelnòu. Aparentament son filh, Simon V, era maridat coma una filha dau comte de Pembroke que prenguet lo chasteu de Bordelha pendant la guerra de Cent Ans. Lo portrach fuguet comandat per Richelieu, per sa « galerie des hommes illustres »...Es pas tròp a sa plaça dins un borg que fai totplen per la cultura e la lenga occitanas.

DG : Coma  se vai debanar queu "omenatge"?
L'afar comença a 5 oras 30 de l'apres-mieijorn, emb una conferencia en francés e en occitan de l'escrivana e universitaria Katy Bernard que faguet un trabalh remirable sur los escrichs daus trobadors. La conferencia « Simon de Montfort, héros tragique de la croisade albigeoise » parla de « la cançon de la crosada » e sera seguida d'un parladis coma lo public. Ela sera seguida, a l'entorn de 7 oras 30 de l'enser, d'un poema musicau occitan francés sur la mòrt de Simon de Montfort interpretat per la tropa « Dies Irae » de Mathieu Boisset et Luc Lainé . Quela tropa, plan talentuosa, ven de Bordeu. Comme auraient dit les femmes de Toulouse : « A ne pas manquer » !

Pratique : L' espectacle comença à 17 o 30, dins lo chasteu medievau, lo pretz de l'entrada es de 10€
Denis Gilabert

https://les-grands-sites-du-perigord.com/les-grands-sites/chateau-de-bourdeilles