Divendres passat 29 de junh, quò era la jornada daus jòunes de la felibrejada, valent a dire per los goiassons de l'escòla mairala, de las calandretas, de la primaria, daus collegis que aprenen l'occitan en Dordonha, mai las escòlas dau ranvers de Sent-Cibran. Lo Bornat dau Perigòrd fai quela jornada per la cinquiesma annada e paia los bus per far venir los dròlles de pertot en Perigòrd ( grandmercés!).

Que se passa pendant quela jornada?
D'en prumier, setz acuilhit per daus benevòles plan gentes dau comitat locau d'organisacion de la felibrejada , que vos menen pendant tota la jornada. Podretz veire las gents de mestier, que vos parlaran en occitan o en francés de lor passion, de lor mestier : molinier, fuelhardaire, faure, escupltor sur boesc, fabricant d'arcs, talhaire de peiras... Los goiassons pausavan totplen de questions. Un moment plan important es lo de la visita a les belhas. Los goiats son totjorn plan interessats e essaian de trobar la reina de las abelhas. Lo vielh materiau agricòla fai veire que las chausas an plan chanjat dempuei las annadas cinquanta. Vesem la vielha batuerza que la machina a vapor fai virar, tots los vielhs tractors que petan enquera. I avia totplen de talhiers, mai un talhier de cosina dau Bornat dau Perigòrd.

Un moment de partatge
Apres la visita aus talhiers e una passejada dins lo borg de Sent-Cibran , plan ben decorat, los escolans son contents de se pausar per marendar e beure un còp jos los aubres...que aüei, fai una caumassa de prumiera ! Quò fai plaser de veire tots quilhs goiassons qu' aprenen l'occitan. Los mai jòunes de las escòlas dau ranvers de Sent-Cibran nos chantan Joan Pitit que dança, Se canta, avant lo baleti per Gilles de Becdelievre et Nicolau Puech. A queste moment, tots los eslevas se botan de dançar lo pas de lop, borrèias, cercle circassian, scottishes, rondeus …en chantar.
Mas n'i a pas de bona companhia que non se quita, ven l'ora de tornar vers los bus...Pas per la gent d'aqui, la jornada continua emb daus spectacles e daus concerts de Peiraguda, de Nadau.

Mercés plan a tot aquel monde plan motivats d'aver far passar aus jòunes un bon moment de conviviença.

Esperam tornar l'an que ven, queste còp, quò sera a Perigüers !

Denis Gilabert

Fotos: los collegians de La Coquilha e de Sent-Abre