Tomas Irondela es president dau Talhier Culturau Occitan de Perigüers. Quela associacion fai partida dau malhum d'associacions coma l'UOCC de Nontron, L'ASCO de Sarlat, Les Abeilles Bergeracoises, Condat Animations e tant d'autras que developan de las activitats per la lenga e la cultura occitana. Lo dijuòus 1er de feurier, tenia son amassada generala e avian convidat Jan-Peire Reidi per una serenada sur sas reviradas de literatura russa en occitan.

DG : Podetz vos presentar, mai los membres dau bureu?
Me sone Tomas Irondela, ai 38 ans, vene de Tarn, rasis Castres e sei professor d'istòria a Laure Gatet onte anime tanben un tahlier d'occitan per liceans. Dins lo bureu, avem Crestian Lafaia, tresaurier e Sigolena Cabie, secretaria, Felipe Corbièra, fidela dempuei la debuta, en tot, una bona vintenada de membres permanents, qu'an la carta dau TCOP e de l'IEO. Trabalham en bona inteligencia coma lo monde de la Calandreta Pergosina de Perigüers, come Xavier Jullien qu'es aqui deser.

DG : Qualas son las activitats dau TCOP?
La tòca de l'associacion es de difusir la cultura occitana au còr de la vila de Perigüers. Laidonc, convidam un còp per mes quauqu'un que fai quauquaren d'actuau per la lenga : un autor, un grope, daus chantaires, un professionau... per presentar lors creacions, lor mestier. Passem la serenada ensemble, partir de 20 oras 30 lo prumier dijuòus dau mes, dins lo café associatiu Les Thétards, rua de la Brida. En fin d'annada 2017, avem convidat Patrick Salinhier de Peiraguda, Laurenç Labadia lo metaire en scena, Francis Gervasi lo contaire e fotografe, Yves Rauzier l'autor de "l'occitan dins las trencadas", Sebastien Girard …De-ser avem Jan-Peire Reidi, per presentar "Lo Nas e lo Manteu", sa revirada en occitan de l'òbra de Nicolas Gògol. Veses, quo es plan variat. Quo es un endrech onte se parla, se chanta, se legit la lenga, pasmens, quo es pas un cors de lenga.

DG: Qui pòt venir a las serenadas?
Quo es dubert a tot lo monde, fau nonmàs prener l'adesion au TCOP e aus Thetards ( au total 10€ per an). En generau, qu'es lo monde daus talhiers de lenga dau ranvers de Perigüers que venen. Dos còps per an, en julhet e en decembre fasem un repas. Comunicam le programa au flor e a mesura.Lo 1er de març mes accuelhirem Peire Martial e lo 5 d'abriau quò sira Dòlan Xakò que vendra presentar son trabalh e far un mini concert.

DG : D'autres projects ?
Volem sensibilisar lo monde a la lenga. Avem un projet d'edicion d'expressions tipicas occitanas de Perigòrd, que farem en ligam emb Novelum.
Denis Gilabert.

Fotò: Tomas Irondela, lo 4esme a mança, presenta lo TCOP