La setmana passada, dau 16 au 19 de mai, 51 eslevas occitanistas daus collegis Charles de Gaulle de La Coquilha e Micheu Debet de Sent Abre partigueren per un viatge de tres jorn dins lo ranvers de Luchon , en Pireneus centralas. Eran lotjat dins un gitre de montanha, La Demeure de Venasque de Didier e Marie-Christine Dienst. Lors objectius eran de far coneissencia emb lo mitant de la montanha, los mestiers e subretot de poder rencontrar e auvir daus montanhòus que parlan l'occitan gascon bigordan. Una autra tòca era la descuberta de la produccion d'electricitat idròelectrica, en ligam emb lor programa sur las energias renovelablas.
Un bessonatge emb lo collegi Edmond Rostand de Luchon
Los dos collegis fuguren reçaubuts dimecres per los escolans de Caròla Dupuy, professor d'occitan au collegi Edmond Rostand de Banhèras de Luchon. Chasque grope an jugat de las peçòtas de teatre, an chantat e dançat mercés los dos jòunes musicaires, accordeonista et violonaire de la classa d'occitan. Se son tornats trobar lo ser per un concert baleti de Mateu Bares, contaire e chantaire dau grope Arredalh, que lor chantet de las chançons de sa compausicion. Se disseren adiu plan emòguts en chantar Se Canta e L'Immortela. La visita dau liceu professionau daus mestiers dau bois e de las termas de Luchon lor balheren benleu de las ideias per lors estudis e lor trabalh dins d'avenir.
Una passejada au lac d'Oo
Dijuòus, comenceren per la randonada en montanha au lac d'Oo. Partits de las bòrias d'Astau d'a pès, arriberen au lac doas oras apres e minjeren sur plaça. Los jornalistas de l'emission de França 3 Viure al Pais los segueren per far un reportatge. Lo menaire, guide de montanha Peire Albero dau bureu de guides de Luchon lor faguet la visita e lo commentari en occitan e tornet l'enser per una conferencia sur son mestier de guide. L'apres mieijorn, lo temps viret a la plueja e quo era lo bon moment per visitar la centrala idròelectrica EDF dau lac d'Oo a Luchon coma Caròlina Saint-Amans de l'Ofici de Torisme.
Lo miau de montanha
Divendres, apres aver visitat la vila de Banhèras, aneren a La miellerie des Sept Molles a Salles e Pratvielh. Lo Tonton Josef, 87 ans, e sa neboda Lucila lor balheren de las explicacions en occitan mai en francés sur las abelhas, los bornats, lo materiau...Tasteren mai d'una sòrta de miau.
Queu viatge fuguet possible per lo sosten dau PNR Perigòrd Lemosin e Lo Bornat dau Perigòrd mai la mobilisacion daus meras dau ranvers de Sent-Abre, qu'an permetut de far un pretz accessible per las familhas. Aura, los eslevas an de la pasta dins la mag per lo compte-rendut!

Denis Gilabert.

Photo: lo menaire, Peire Albero, davant la ròcha sofrada sur lo chamin dau lac d'Oo

De legir, tanben dins lo jornau regionau: http://www.ladepeche.fr/article/2017/05/18/2576987-rencontres-autour-de-l-occitan.html

Et l'émission occitane de France 3 occitanie ( cliquer sur la reidffusion de l'émission du 20 mai 2017):http://france3-regions.francetvinfo.fr/occitanie/emissions/jt-local-1920-edicion-occitana

La rubrica en òc dins Sudouest.fr :http://www.sudouest.fr/2017/05/22/lo-perigord-occitan-visita-las-pireneus-3467110-6830.php?xtmc=Denis+Gilabert&xtnp=1&xtcr=1

E quauquas fotòs mai...