Questa setmana sera occitana a la maison de retirada de Nontron. Richard Rebière, responsable de las animacions e Patric Ratineaud de l'Union Occitana Camila Chabaneu an decidat d'organisar totplen d'activitats a l'entorn de la lenga e la cultura occitana, una prumièra . 

"Una bona part daus residents mai dau personau saben parlar, mas zo fan pas sovent ; la vergonha e l'interdich demòran enquera. L'objectiu es de botar tot lo monde a l'aisa e donar una occasion d'auvir, chantar e parlar la linga e quitament dançar", ço-ditz Richard Rebière.

Coma quò se vai debanar ?

"Chasque jorn, farem una revueda de premsa en francés mai en occitan, per Joan-Pau Laplanha o Sergi Gilardi. Per disnar, minjarem daus plats perigòrds : sopa de talhas, bodin a las chastenhas, charn de vedeu aus champanhòus, torrin e.a.c... L'apres-mieijorn sera lo temps de las activitats culturalas : Patric Ratineaud presentara lo domeni occitan. "Lenga d'amor", lo film de Patric La Vau que fuguet virat en nontronés sera mostrat en presencia de l'autor. Lo grope nontronés La Tireta Duberta vendra chantar e far veire lors instruments. Divendres apres-mieijorn sera consacrada a de las nhòrlas, daus contes en occitan : avem daus convidats de renom, coma Jan-Peire Reidi, Gilbert Borgés, Odette Marcillaud que sap finament contar las istòrias de Félicie Brouillet. En fin d'apres-mieijorn Patric Ratineaud fara escotar daus CD de musica occitana o veire daus films en occitan ».

E per la dança ?

"Dissabde apres mieijorn, partir de 2 oras e demia, quò sera lo grand baleti "trad" coma los Zinzonaires. Queu bale es a gratis e dubert a tots los que vòlen venir, de Nontron o d'alhors.

Coma quò se vai chabar, questa setmana ?

"Farem dos concors. Lo prumier, per los emplejats se sonara "Oc langue" ; los residents chausiran l'emplejat qu'aura lo mai sovent praticat la lenga occitana. Un present l'i sera ofert per lo director Christian Laffargue. Un segond concors sera organisat per los residents qu'auran lo mai parlat occitan. Los animators e lo personau son plan motivats. Esperam que lo monde van se prener au juec e participar. Degun sera laissat de costat, las activitats seran filmadas e difusadas sur la chadena interna per los que demòran dins las chambras. Las familhas son benvengudas, tota la setmana ! ».

Bonne chance donc à cette nouvelle initiative dans cette partie du Périgord qui n'en manque pas ! Denis Gilabert.