Per lo prumier còp, «mas de segur pas per lo darrier », ço-disset Olivier Boudy President dau Bornat dau Perigòrd, la Felibrejada decidet d'organizar una jornada per los escolans e collegians qu'aprenen l'occitan dins lo departament mai los dau canton de Vertelhac.

« Una jornada força interessanta e plan ben organizada » ço-disset un famos professor d'occitan a Perigüers e Brantòsme e animator de radiò ( Marçau Peironi, l'aviatz conegut de segur). Una genta persona dau ranvers, en costume tradicionau, acompahnet chasque grope pendant tota la jornada. En una vintenada de talhiers, los jòunes an pògut rencontrar daus artisans, artistes, professionaus que lor parleren en occitan e en francès de lor passion.

Coma de costuma, las farralhas, los vielhs petarons, la dalhuza, la baturza eran quì e viravan enquera. Lo teulaire monlet daus teules canau davant los eslevas. L'esculptaire sur boesc Mr Laurenç de Vancens expliquet en occitan e en detalh coma far surtir la forma dau materiau. Un expausat complet fuguet fach per « Le Rucher du Périgord », seguit per una degustacion de brescha frescha e de miau de caulzat, de ronze o de chastanh. Pòguèrem verifiar un còp de mai lo biais de dire« Culherada de miau trapa mai de moschas que barricon de vinagre » quante los dròlles botavan lo det dins lo miau fresche. Lo molinier Alan Mazeu, dau Molin de la Pausa a Sent Meard de Drona expliquet l'evolucion dau trabalh dau grun, dempuei l'esbolhatge daus prumiers òmes jusc'a la monaria e la minotaria actualas. Talhadors de peire, esculptaires, fotògrafes, juòcs ancians, bolengier...Auria faugut dos jorns per tot veire!

Musica e dança fugueren plan ben representadas : « Les chanterelles » de Gots-Rossinhòu jugueren e chanteren Turlututu emb los dròlles, avant lo talhier de danças tradicionalas. Apres la taulada, lo grope Talabast faguet un concert onte los jòunes pògueren dançar, borèia, sautiera, cercle circassian mai chantar « Se canta » a la fin. « Quò fai plaser de veire tots quilhs jòunes dansar, chantar e s'interessar a l'occitan » me disset un brave òme. «Qu'era geniau e plan interessant» disset una genta goiata. Tradicion e avenidor se tornan botar ensemble.

Une journée essentielle pour la découverte, le plaisir et la transmission, préparée de main de maître par les intervenants, les bénévoles du canton de Verteillac et du Bornat, pour le plus grand bonheur des élèves et leurs professeurs.

Denis Gilabert.