'Na vielha veitura rolhada, obludada lo long d'un chamin dins un boesc, porriá estre considerada per quauqu'uns coma 'na pollucion, un començament de borrigier sauvatge... ! Per lo Tuba'Rolha, fotògrafe, -« amator » insista-t-eu- la trentena, originari de St-Pardol la Ribiera, qu'es un object d'art « customisat » per lo temps, recubert de romdres, liedra e ortrijas, tesmoenh d'una epòca qu'eu aima fotografiar sus totas las coturas. E si, en mai, eu tròba un document de la vita de tots los jorns, coma un jornau... 'na carta de juòc a gratar... demorats sus lo sieti... eu los fixa tanben coma son objectiu.

Eu vòu ni dire son nom ni divulgar los luòcs qu'eu visita de paur que n'en venha se servir en peças destachadas... eu tuca ren... eu ven juste fotografiar per lo plaser de fixar 'quelas mecanicas chamnhadas per la natura.

Quand n'um li damanda d'ente ven 'quela passion de 'quelas vielhas veituras, eu respond emb un grand rison que 'quò ven de sa granda-mair qui sens zò saber, l'aviá abonat, quand eu aviá 8 ans a 'na revuda mensuala de camions e autras viròlhas « Charge Utile », qu'exista totjorn.

Eu i aviá descubert de las fotografias d'espavas, de rolha, de besunhas abandonadas, qu'eu trobet a son gost ! E perque pas, se aitot, ne'n far coma son pitit aparelh que se getava per las envoiar ? Çò qu'eu faguet e quauqu'unas fugueren publicadas ! Un encoratjament per segre dins 'quela via.

Alaidonc, pendent de las annadas, eu s'es pradelat dins tots los chamins daus alentorns puei a agrandit son territòri dins d'autras regions a la rechercha de novelas espavas.

Sas fotògrafias publicadas via Internet li an permetut d'encontrar de noveus amics en Belgica, au Luxemborg... rencontras non virtualas, 'queste còp, perque se balheren rendetz-vos, durant las vacanças a La Rochela, per desnichar d'autras carcassas dins de noveus decòrs.

Dempuei lo 12 de janvier, data de la creacion de sa paja « Tuba'Rouille » sus Facebook, eu compta desja 800 personas que lo seguen ! Succes que lo surpren se-mesma !

E perque pas organizar 'n'expausicion, editar daus libres... de sas fotòs las mai bravas, de mecanicas engabiadas per la natura ? Qu'es pas los projects que li manquen d'abòrd que l'embarrament sirá 'chabat ! Qu'es segur qu'eu tornará partir per de novelas peregrinacions dins daus luòcs delaissats en questa de fotòs insolitas !

Jaumeta Beauzetie

Fotò dau camion de l'espicier d'autres còps en Charanta occitana !