Veiqui un daus famos "Raibes negres" de Gilbert Borgés que nos laisset a la debuta de l'estiu passat.

°°

Piaus au mitan(2) de l’eschina. Barba a la Bakounine. Sei a l’universitat. A Bordeu. Aprentit sociològue. La setmana, quò vai. La diumenchada, degun a Bordeu. Me’n tòrne chas nos. Dissabdes. Ceu gris. Començament de l’aprep-miegjorn. Merchat ‘chabat. Sus lo trepador(2). Coma La Luna e Pinpon.

- Que fam ?

- Vam beure un cafe a l’Osteu de França ?

Los ‘reste.

- Esperatz enquera un pauc. Quò vai tornar començar…

Lo brave gendarma Guibòla avança sa fòrma de botelha de Perrier en sauticar d’un pés sus l’autre. Se ‘resta a trenta centimetres de me.

- Contròle d’identitat lo pialut, çò-ditz. Pòdes me presentar tos papiers ?

La Luna se quilha.

- … Mas li avetz desjá damandat sos papiers i a vint minutas...

- … E eimatin quand sei ‘ribat au merchat…

Lo brave gendarma Guibòla pausa la man sus la cròssa de son Manurhin.

- Podetz me presentar vòstres papiers aitot, tots dos ?

Quò es entau tots los dissabdes. Me sei pas enquera fach borar.

Gilbert Borgés.

Vocabulari : (1) milieu (2) trottoir