Coneisstez de segur, l'Estivada de Rodez, dau 23 au 27 de julhet, lo mai beu daus festivaus occitans, que festa sos vint ans. Mas, sabetz benleu pas que lo monde perigòrd i an una plaça particuliera. Son director actuau , Patric Roux nos disset: « Naquí a Sarlat, chas nos parlavan la lenga e seguí los cors d'occitan, francés, latin coma Micheu Chapduelh. Mos parents demoran au Cos e Bigaròc. Ai migrat a Narbona per mon trabalh de formator a la cambra d'agricultura, mas tòrne au pais tanleu possible ». En 2008, Patric prenguet la direccion de l'Estivada, un emplec a plen temps.« Qu'es un pauc coma lo tabac que fasiam venir chas nos; apres la denada, fau començar una novela sason. L'an passat, avem agut 100000 vesitadors, podem parlar d'un succès, mas nòstre objectiu es alhors.Volem sensibilizar lo mai de monde possible a la lenga e la cultura occitanas en far un mescladitz rich de chausidas artisticas. Devem consolidar l'organisacion financiera, pratica et logistica, far de la captacion professionala daus espectacles per los artistes. Aura, l'Estivada es l' exemple unic de collaboracion entre 8 regions de França mai las valadas italianas e la Catalonha». E los perigòrds dins la programacion ? «Lo dissabte 27, Daniel Chavaròcha dira daus contes, lo grope Talabast jogaran lo mesme jorn. Marçau Peironi fara una intervencion dins l'encastre d'un talhier « Passaires de lenga e de cultura » lo 26, Joan Ganhaire vendra dedicaçar sos libres a l'Espaci Edicion lo 24 , los jòunes comedians de « Benvenguda en Perigòrd vendran tanben. Daus perigòrds, ne'n avem dins l'organisacion : en mai de io, Danis Chapduelh , en charja de comunicacion prenguet la seguida de Gina Bonafon a sa retirada. ». E apres ? «Coma Sergiò Berardi dau grope Lou Dalfin, anem preparar L'Uvernada, continuitat ivernala de l'Estivada dins la valadas occitanas italianas, a Borgo di San Delmazzo, en novembre».Des journées bien remplies pour Patric qui sait mener de front plusieurs projets majeurs ! Denis Gilabert.

De veire lo programa sur lo site: www.estivada-rodez.eu .